ചെരാത് അഖിലേന്ത്യാ സെവൻസ് ഫുട്ബോൾ ടൂർണ്ണമെന്റിന് ഇന്ന് കിക്കോഫ്

വളാഞ്ചേരി ചെരാത് അഖിലേന്ത്യാ സെവൻസ് ഫുട്ബോൾ ടൂർണ്ണമെന്റിന് വ്യാഴാഴ്ച കിക്കോഫ്. ഒരു മാസത്തെ ഫുട്ബോൾ മേളയിൽ 24 ടീമുകൾ പോരാടും.

കൊട്ടാരം മിലൻ സ്റ്റേഡിയത്തിൽ ഇന്ന് രാത്രി എട്ടിന് മുൻ അഖിലേന്ത്യാ താരവും എം‌എസ്‌പി കമാൻഡന്റുമാ‍യ യു ഷറഫലി ഈ വർഷത്തെ ടൂർണ്ണമെന്റ് ഉദ്‌ഘാടനം ചെയ്യും. വളാഞ്ചേരി ഗ്രാമ പഞ്ചായത്ത് പ്രസിഡന്റ് ടി‌പി അബ്ദുൽഗഫൂർ അധ്യക്ഷത വഹിക്കുന്ന ചടങ്ങിൽ അണ്ടർ – 16 സാഫ് കപ്പിലെ ജേതാക്കളായ ഇന്ത്യൻ ടീമിലെ ഏക മലയാളി താരം മുഹമ്മദ് ഫാസിലിനെ അനുമോദിക്കും. ടൂർണ്ണമെന്റിലെ ആദ്യ മത്സരത്തിൽ, കോട്ടക്കൽ സബാൻ എഫ്‌സി, ജയ തൃശൂരിനെ നേരിടും.

ടൂർണ്ണമെന്റിൽ നിന്നും ലഭിക്കുന്ന വരുമാനത്തിൽ ഒരു ലക്ഷം രൂപ പരി‌രക്ഷാ പദ്ധതിക്കും ഒരു ലക്ഷം രൂപ പഞ്ചായത്ത് സ്റ്റേഡിയത്തിന്റെ നിർമ്മാണത്തിനുമായി നൽകുമെന്ന് കെ‌പി യൂസഫ് ഹാജി, പി സൈതാലിക്കുട്ടി ഹാജി, സത്താർ പാറ്റപ്പുറത്ത്, വിടി നാസർ, സി കെ നാസർ, പി കെ മണികണ്ഠൻ എന്നിവർ പത്രസമ്മേളനത്തിൽ പറഞ്ഞു.