മൂടാൽ-കഞ്ഞിപ്പുര ബൈപ്പാസ്: അഞ്ചുകോടിയുടെ സാങ്കേതികാനുമതിയായി

വളാഞ്ചേരി : കഞ്ഞിപ്പുര-മൂടാൽ ബൈപ്പാസ് റോഡിന്റെ നിർമാണത്തിന് ബജറ്റിൽ ഉൾപ്പെടുത്തി അനുവദിച്ച അഞ്ച്‌കോടി രൂപയ്ക്ക് സാങ്കേതികാനുമതി ലഭിച്ചതായി പ്രൊഫ. ആബിദ് ഹുസൈൻ തങ്ങൾ എം.എൽ.എ. പറഞ്ഞു. 2023-24 ബജറ്റിൽ ധനമന്ത്രി കെ.എൻ. ബാലഗോപാലിന്റെ മറുപടി പ്രസംഗത്തിലാണ് ബൈപ്പാസ് നിർമാണത്തിന് അഞ്ച്‌കോടി രൂപ പ്രഖ്യാപിച്ചത്. നേരത്തേ 13.37 കോടിയുടെ റിവൈസ്ഡ് എസ്റ്റിമേറ്റിന് അംഗീകാരം ലഭിച്ചിരുന്നു. ബജറ്റിൽ ഉൾപ്പെടുത്തുന്നതിന് കോട്ടയ്ക്കൽ മണ്ഡലത്തിൽനിന്ന് എം.എൽ.എ. നൽകിയ ശുപാർശകളിൽ ആദ്യത്തേതായിരുന്നു കഞ്ഞിപ്പുര-മൂടാൽ ബൈപാസ് പൂർത്തീകരണത്തിന് ഫണ്ടനുവദിക്കണമെന്നുള്ളത്. ബൈപ്പാസിലെ അമ്പലപ്പറമ്പ് മുതൽ മൂടാൽചുങ്കം വരെയുള്ള 1.71കി.മീറ്റർ ഭാഗവും കഞ്ഞിപ്പുരമുതൽ അമ്പലപ്പറമ്പ് വരെയുള്ള 2.5കി. മീറ്റർ ദൂരവും ടാറിങ്‌ നേരത്തേ പൂർത്തിയായിട്ടുണ്ട്.