മണൽ കടത്താൻ വാഹനങ്ങൾ മോഷ്ട്ടിക്കുന്ന മൂന്ന് പേരെ വളാഞ്ചേരി പോലീസ് അറസ്റ്റ് ചെയ്തു.

വളാഞ്ചേരി: മണൽ മാഹിയയുടെ ആവശ്യങ്ങൾക്ക് വേണ്ടി വാഹനങ്ങൾ മോഷണം ചെയ്യുന്ന മൂന്നംഗ സംഘത്തെ വളാഞ്ചേരി പോലീസ് അറസ്റ്റ് ചെയ്തു. കഴിഞ്ഞ വർഷം മെയ് മാസം കളവ് പോയ ഗുഡ്സ് ഓട്ടോയെ കുറിച്ചുള്ള അന്വേഷണമാണ് പ്രതികളിലേക്കെത്തിച്ചത്. അയങ്കലം കടകശ്ശേരി സ്വദേശി മുഹമ്മദ് മുസ്ഥഫ, കുറ്റിപ്പുറം സ്വദേശി മുഹമ്മദ് ആഷിഫ്, വിപിൻ എന്നിവരേയാണ് വളാഞ്ചേരി SHO എം കെ ഷാജിയുടെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. പ്രതികളുടെ പേരിൽ തൃത്താല പോലീസിൽ സമാനമായ മറ്റൊരു കേസു കൂടി ഉണ്ടെന്നും അന്വേഷണ ഉദ്യോഗസ്ഥ തലവൻ കൂടിയായ SHO എംകെ ഷാജി മാധ്യമങ്ങളോട് പറഞ്ഞു. എസ് ഐ മാരായ സിപി ഇഖ്ബാൽ, മുരളീകൃഷണൻ, എ.എസ്.ഐ മാരായ രാജൻ,സുനിൽ കുമാർ എന്നിവരും അന്വേഷണ സംഘത്തിൽ ഉണ്ടായിരുന്നു.