പുറമണ്ണൂരിൽ പുഴയിലേക്കുവീണ മരങ്ങൾ മുറിച്ചുമാറ്റി സന്നദ്ധപ്രവർത്തകർ

ഇരിമ്പിളിയം: തൂതപ്പുഴ ഒഴുകുന്ന ഇരിമ്പിളിയം പഞ്ചായത്തിലെ പുറമണ്ണൂർ ഭാഗത്ത് നീരൊഴുക്ക് സുഗമമാക്കാൻ പുഴയിലേക്ക് കടപുഴകിവീണ മരങ്ങൾ സന്നദ്ധപ്രവർത്തകർ മുറിച്ചുമാറ്റി. പുറമണ്ണൂർ മേഖലാ മുസ്‌ലിംലീഗ്, യൂത്ത്‌ലീഗ്, എം.എസ്.എഫ്, കെ.എം.സി.സി. പ്രവർത്തകരാണ് മരങ്ങൾ മുറിച്ചുനീക്കിയത്. കഴിഞ്ഞവർഷത്തെ പ്രളയത്തിൽ പുഴ കരകവിഞ്ഞതിനെത്തുടർന്ന് പുഴയോരം മീറ്ററുകളോളം ഇടിഞ്ഞിരുന്നു. ഇതേത്തുടർന്നാണ് പുഴയിലേക്ക് മരങ്ങൾ നിലംപൊത്തിയത്.

വാർഡ് അംഗം വി.ടി. അമീർ, കെ. മാനുപ്പ, എൻ. കുഞ്ഞാപ്പു, ഷമീം, ഷാഫി, യൂനുസ്, മൊയ്തു, എം.ടി. റഫീഖ്, കെ.പി. മുജീബ് തുടങ്ങിയവർ നേതൃത്വംനൽകി. ബ്ലോക്ക് പ്രസിഡന്റ് ആതവനാട് മുഹമ്മദ്കുട്ടി, ബ്ലോക്ക് ക്ഷേമകാര്യ സ്ഥിരംസമിതി അധ്യക്ഷ ഫസീല എന്നിവരും പങ്കെടുത്തു.