പട്ടർനടക്കാവ് കമാനം തോടിന്റെ തകർന്ന ഭിത്തിയിലേക്ക് കാർ ഇടിച്ചു കയറി

തിരുനാവായ : പട്ടർനടക്കാവ് കമാനം വളവിൽ കാർ ഇടിച്ചുകയറി. അപകടത്തിൽനിന്ന് നിസ്സാര പരിക്കുകളോടെ വേങ്ങര സ്വദേശിയായ ഡ്രൈവർ രക്ഷപ്പെട്ടു. തിങ്കളാഴ്ച രാത്രിയായിരുന്നു അപകടം. എറണാകുളത്തുനിന്ന്‌ വേങ്ങരയിലേക്ക് പോകുന്നതിനിടെയാണ് അപകടമുണ്ടായത്.

ഈഭാഗത്ത് നിരവധി അപകടങ്ങളാണ് ദിനംപ്രതി നടക്കുന്നത്. ബൈക്കും കാറും ഉൾപ്പെടെയുള്ള ചെറുവാഹനങ്ങൾ തോട്ടിലേക്ക് മറിയുന്നത് പതിവുകാഴ്ചയാണ്. കമാനത്തിന്റെ വലതുവശത്തോടുചേർന്ന ഭാഗങ്ങളിലും മറ്റും കൈവരിയില്ലാത്തത് വാഹനയാത്രികർക്ക് ഭീഷണിയാണ്. വലിയ അപകടമേഖലയായ ഇവിടെ വെളിച്ചമില്ലാത്തത് അപകടങ്ങളുടെ തോത് വർധിപ്പിക്കുന്നുണ്ട്.

റോഡിന്റെ ഇരുവശത്തോട് ചേർന്നൊഴുകുന്ന കമാനം തോടിന്റെ തകർന്ന ഭിത്തികൾ പുനർനിർമിക്കുന്നതിനും പുതിയ ഭിത്തികൾ നിർമിക്കുന്നതിനും പൊതുമരാമത്തുവകുപ്പ് അടിയന്തരമായി ഇടപെടണമെന്നും ഹൈമാസ്റ്റ്‌ ലൈറ്റുകൾ സ്ഥാപിക്കുന്നതിന് എം.എൽ.എയോ പഞ്ചായത്തോ നടപടി സ്വീകരിക്കണമെന്നുള്ള ആവശ്യത്തിന് വർഷങ്ങളുടെ പഴക്കമുണ്ട്.