കഞ്ഞിപ്പുരയിൽ ഓടിക്കൊണ്ടിരുന്ന ടെമ്പോ ട്രാവലറിന് തീപ്പിടിച്ചു; ആളപായമില്ല

വളാഞ്ചേരി: കഞ്ഞിപ്പുരയിൽ ഓടിക്കൊണ്ടിരുന്ന ടെമ്പോ ട്രാവലറിന് തീപ്പിടിച്ചു. ദേശീയപാത 66ലെ കരിപ്പോളിനും കഞ്ഞിപ്പുരയ്ക്കും ഇടയിലെ നഴ്സറിക്കു മുന്നിൽ വച്ച് ഇന്ന് പതിനൊന്നോടെയാണ് സംഭവമുണ്ടായത്. കോയമ്പത്തൂരിൽ നിന്ന് കാടാമ്പുഴ ക്ഷേത്രത്തിലേക്ക് ദർശനത്തിന് വന്ന സ്ത്രീകളും കുട്ടികളുമടങ്ങുന്ന സംഘമാണ് വാഹനത്തിൽ യാത്രചെയ്തിരുന്നത്. വാഹനത്തിൻ്റെ എഞ്ചിൻ ഭാഗത്ത് നിന്ന് പുക ഉയരുന്നത് കണ്ട ഡ്രൈവർ വാഹനം നിർത്തി യാത്രക്കാർ പുറത്തിറങ്ങിയതിനാൽ ആളപായമുണ്ടായില്ല. വാഹനം കത്തുന്നത് കണ്ട നാട്ടുകാർ സമീപത്തെ നഴ്സറിയിൽ നിന്ന് മോട്ടോർ ഉപയോഗിച്ച് തീ അണക്കാൻ ശ്രമം നടത്തിയെങ്കിലും പരാജയപ്പെട്ടു. തിരൂരിൽ നിന്നുള്ള ഫയർ ഫോഴ്സ് സംഘം സ്ഥലത്തെത്തിയപ്പോഴേക്കും വാഹനം ഏതാണ്ട് പൂർണമായി കത്തിയമർന്നിരുന്നു.