പുത്തനത്താണി അതിരുമടയിൽ 12 മണിക്കൂറിനിടെ രണ്ട് വാഹനാപകടങ്ങൾ; ആളപായമില്ല

കൽപകഞ്ചേരി: ദേശീയപാത 66ലെ പുത്തനത്താണി അതിരുമടയിൽ 12 മണിക്കൂറിനിടെ നാലു വാഹനങ്ങൾ അപകടത്തിൽപ്പെട്ടു. പുത്തനത്താണിയ്ക്കും അതിരുമടയ്ക്കുമിടയിലെ വളവിലാണ് വാഹനാപകട പരമ്പര ഉണ്ടായത്. ബുധനാഴ്ച രാത്രിയുണ്ടായ അപകടത്തിൽ പുത്തനത്താണി ഭാഗത്തേയ്ക്ക് വരികയായിരുന്ന കാറും എതിർ ദിശയിൽ നിന്നും വന്ന ചരക്കു ട്രക്കും തമ്മിലാണ് കൂട്ടിയിടിച്ചത്. അപകടത്തിൽ ആർക്കും പരുക്കില്ല. ഇടിയിൽ കാറിന്റെ മുൻവശം പൂർണമായും തകർന്നു.

വ്യാഴാഴ്ച രാവിലെയായിരുന്നു മറ്റൊരപകടം. കോട്ടയ്ക്കൽ ഭാഗത്തു നിന്നും വന്ന സ്വകാര്യ ബസ്സും കാറും തമ്മിലാണ് കൂട്ടിയിടിച്ചത്. കാർ റോഡിലേയ്ക്ക് കയറാൻ ശ്രമിക്കുന്നതിനിടെയായിരുന്നു അപകടം. രണ്ടു അപകടങ്ങളിലും ആർക്കും പരുക്കില്ല.