കുറ്റിപ്പുറത്ത് വ്യാജ നമ്പർ പതിച്ച് നിരത്തിലിറങ്ങിയ കാർ മോട്ടോർവാഹന വകുപ്പ് പിടികൂടി

കുറ്റിപ്പുറം: വ്യാജ നമ്പർ പതിച്ച് റോഡിൽ കറങ്ങിയ കാർ മോട്ടോർവാഹന വകുപ്പ് പിടികൂടി. കോട്ടയ്ക്കലിൽനിന്നെത്തിയ മോട്ടോർവാഹന വകുപ്പ് എൻഫോഴ്സ്‌മെന്റ് വിഭാഗം കുറ്റിപ്പുറത്ത് നടത്തിയ പരിശോധനയിലാണ് കാർ പിടികൂടിയത്. കാറിന്റെ രജിസ്ട്രേഷൻ നമ്പറിനു മുകളിൽ മറ്റൊരു നമ്പർ ഒട്ടിച്ചുവെച്ച നിലയിലായിരുന്നു. സംശയംതോന്നി കൂടുതൽ പരിശോധിച്ചപ്പോൾ മറ്റൊരു വാഹനത്തിന്റെ ബോഡിയും ചെയ്സിസ് നമ്പറുമാണ് ഇതിനുള്ളതെന്നു കണ്ടെത്തി.

ഇതോടെ വാഹനം തുടർനടപടികൾക്കായി ആർ.ടി.ഒ. കെ.കെ. സുരേഷ്‌കുമാറിന്റെ നിർദേശപ്രകാരം കുറ്റിപ്പുറം പോലീസിന് കൈമാറി. മോട്ടോർവാഹന വകുപ്പ് എൻഫോഴ്സ്‌മെന്റ് എ.എം.വി.ഐ.മാരായ വിജീഷ് വാലേരി, കെ.ആർ. ഹരിലാൽ, എസ്. സുനിൽരാജ് തുടങ്ങിയവർ പരിശോധനയ്ക്ക് നേതൃത്വംനൽകി.