തിരൂരിൽ സ്വകാര്യബസ്‌പണിമുടക്ക് പൂർണം

തിരൂർ : നഗരത്തിലെ റോഡുകളുടെ ശോച്യാവസ്ഥ പരിഹരിക്കുക, അശാസ്ത്രീയമായ ഗതാഗതപരിഷ്കരണം അവസാനിപ്പിക്കുക എന്നീ ആവശ്യങ്ങൾ ഉന്നയിച്ച് തിരൂരിൽ ബുധനാഴ്ച സ്വകാര്യ ബസുകൾ പണിമുടക്കി. തിരൂരിൽനിന്ന് സർവീസ് നടത്തുന്ന സ്വകാര്യ ബസുകളൊന്നും റോഡിലിറങ്ങിയില്ല. ബസ് തൊഴിലാളി യൂണിയനുകൾ സംയുക്തമായാണ് സമരം നടത്തിയത്. തിരൂർ -മലപ്പുറം റോഡ്, തിരൂർ-വളാഞ്ചേരി റോഡ്, തിരൂർ-പനമ്പാലം റോഡ്, തിരൂർ-ഏഴൂർ റോഡ് അടക്കമുള്ള റോഡുകളുടെ ദുരവസ്ഥ എത്രയുംപെട്ടെന്ന് പരിഹരിക്കണമെന്നും. മോട്ടോർ വാഹന വകുപ്പിന്റെ തൊഴിലാളിവിരുദ്ധ നിലപാട് അവസാനിപ്പിക്കണമെന്നും നഗരത്തിലെ തലതിരിഞ്ഞ ട്രാഫിക് പരിഷ്കരണം നിർത്തലാക്കണമെന്നതടക്കമുള്ള ആവശ്യങ്ങൾ ഉന്നയിച്ചാണ് പണിമുടക്ക്.