പുത്തനത്താണിയില്‍ സ്വകാര്യ ബസും കാറും കൂട്ടിയിടിച്ച് ഒരാള്‍ മരിച്ചു;14 പേര്‍ക്ക് പരിക്ക്
പുത്തനത്താണി: ദേശീയ പാത 66ല്‍ പുത്തനത്താണിക്കു സമീപം സ്വകാര്യ ബസും കാറും തമ്മില്‍ കൂട്ടിയിടിച്ച് കാര്‍ ഡ്രൈവര്‍ മരിച്ചു. 14 പേര്‍ക്ക് പരിക്കേറ്റു. കൊണ്ടോട്ടി സ്വദേശി വെളുത്തേടത്ത് അബുവിന്റെ മകന്‍ അഹമ്മദ് എന്ന ബാബു (43) ആണ് മരിച്ചത്. ബസ് യാത്രക്കാരായ 13 പേര്‍ക്കും കാര്‍ യാത്രക്കാരനായ ഒരാള്‍ക്കുമാണ് പരിക്കേറ്റത്. പരിക്കേറ്റവരെയെല്ലാം കോട്ടക്കല്‍ ചങ്കുവെട്ടിയിലെ സ്വകാര്യ ആശുപത്രികളില്‍ പ്രവേശിപ്പിച്ചു. ആരുടെയും പരിക്ക് ഗുരുതരമല്ല.ശനിയാഴ്ച്ച രാവിലെ 9.30 ഓടെയാണ് അപകടം. കാടാമ്പുഴയില്‍ നിന്നും കോട്ടക്കലിലേക്ക് വരികയായിരുന്ന ബസ്സും ബേപ്പൂരില്‍ നിന്നും കൊടുങ്ങല്ലൂര്‍ മുനമ്പത്തേക്ക് പോവുകയായിരുന്ന കാറും തമ്മില്‍ കൂട്ടിയിടിക്കുകയായിരുന്നു. ഗുരുതരമായി പരിക്കേറ്റ ബാബുവിനെ ഉടന്‍ തന്നെ കോട്ടക്കലിലെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. കല്‍പകഞ്ചേരി പോലീസ് ഇന്‍ക്വസ്റ്റ് നടത്തിയ മൃതദേഹം പോസ്റ്റുമോര്‍ട്ടത്തിനായി തിരൂര്‍ ജില്ലാ ആശുപത്രിയിലേക്ക് മാറ്റി. പോസ്റ്റുമോര്‍ട്ടത്തിന് ശേഷം മയ്യത്ത് ഇന്ന് വൈകീട്ടോടെ കൊണ്ടോട്ടി ടൗണ്‍ ജുമാ മസ്ജിദില്‍ ഖബറടക്കും.
വളാഞ്ചേരി ഓൺലൈൻ വാർത്തകൾ വാട്സാപ്പിൽ ലഭിക്കാൻ Click Here.
വളാഞ്ചേരി ഓൺലൈൻ ഇപ്പോൾ ടെലഗ്രാമിലും ലഭ്യമാണ്. സബ്സ്ക്രൈബ് ചെയ്യൂ Click Here
