കുറ്റിപ്പുറത്ത് സ്വകാര്യബസ് ഇടിച്ച് ബൈക്ക് യാത്രികന് ഗുരുതര പരുക്ക്

കുറ്റിപ്പുറം: നഗരത്തിലെ തിരക്കേറിയ വളവിലൂടെ വേഗത്തിലെത്തിയ സ്വകാര്യബസ് ഇടിച്ച് ബൈക്ക് യാത്രികനായ യുവാവിന് ഗുരുതര പരുക്ക്. പരുക്കേറ്റ കൽപ്പകഞ്ചേരി സ്വദേശി മേലേതിൽ ബാസി(22)നെ പെരിന്തൽമണ്ണയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ വൈകിട്ടു മൂന്നോടെ കുറ്റിപ്പുറം തിരൂർ റോഡ് ജംക്‌ഷൻ വളവിൽ പെട്രോൾ പമ്പിന് സമീപത്തായിരുന്നു അപകടം.

സമീപത്തെ ബേക്കറിയിൽനിന്നു സാധനം വാങ്ങി ബൈക്കിൽ കയറുന്നതിനിടെയാണ് ബാസിൻ അപകടത്തിൽപെട്ടത്. വളവ് തിരിഞ്ഞെത്തിയ ദീർഘദൂര ബസ് ബൈക്കിൽ തട്ടുകയായിരുന്നു. ബൈക്കുമായി താഴെവീണ ബാസിനെ ബസ് വലിച്ചിഴച്ചു. അപകടത്തെ തുടർന്ന് ബസ് ‍ഡ്രൈവറെ നാട്ടുകാർ കയ്യേറ്റം ചെയ്തു. ബസ് കുറ്റിപ്പുറം പൊലീസ് കസ്റ്റഡിയിലെടുത്തു.