മൂടാലിൽ പാറമടയിലെ പായലിൽ കുരുങ്ങിയ മയിലിനെ രക്ഷപ്പെടുത്തി

കുറ്റിപ്പുറം : പാറമടയിലെ വെള്ളത്തിലെ പായലിൽ കുരുങ്ങിയ മയിലിനെ രക്ഷപ്പെടുത്തി. മാമ്പാറ പിലാത്തോട്ടത്തിൽ അബുവിന്റെ പറമ്പിലെ പാറമടയിലെ പായലിലാണ് ഞായറാഴ്‌ച രാവിലെ മയിൽ കുരുങ്ങിയത്. ചിറകുകൾ പായലിൽ കുരുങ്ങിയതിനെത്തുടർന്ന് തളർന്ന് അവശനിലയിൽ മയിലിനെ കണ്ട പ്രദേശത്തുകാർ വിവരം വാർഡംഗം സാബാ കരീമിനെ അറിയിച്ചു. അദ്ദേഹം വനംവകുപ്പ് ഉദ്യോഗസ്ഥരെ അറിയിച്ചതിനനുസരിച്ച് ആർ.ആർ.ടി. ടീമിൽ ഉൾപ്പെട്ട കൈപ്പുറം അബ്ബാസ് സ്ഥലത്തെത്തി.

കൈപ്പുറം അബ്ബാസ്, സാബാ കരീം പ്രദേശത്തുകാരായ ചക്കുളപ്പിൽ സുധീർ, വേണു, ബാബു, സക്കീർ എന്നിവർചേർന്ന് മയിലിനെ പായലിൽനിന്നു രക്ഷപ്പെടുത്തി. മയിലിന് കാര്യമായ പരിക്കുകളൊന്നുമില്ലാത്തതിനാൽ വനംവകുപ്പിന്റെ അനുമതിയോടെ പിന്നീട് വിട്ടയച്ചു.