പാങ്ങ് പള്ളിപ്പറമ്പിൽ വീണ്ടും അപകടം; വൈദ്യുതിക്കാലിലിടിച്ച ലോറി കടയിലേക്ക് മറിഞ്ഞു

കൊളത്തൂർ∙ സ്ഥിരം അപകടമേഖലയായ പാങ്ങ് പള്ളിപ്പറമ്പിൽ വീണ്ടും അപകടം. വൈദ്യുതിക്കാലിൽ ഇടിച്ചുതകർത്ത ലോറി കടയിലേക്കു മറഞ്ഞു. ലോറിയിലുണ്ടായിരുന്ന ഡ്രൈവർ കറുപ്പസ്വാമി (27), ജയരാജ് (30) എന്നിവർക്കു പരുക്കേറ്റു. കടയുടെ മുൻവശം പൂർണമായി തകർന്നു. ശിവകാശിയിൽനിന്നു കാടാമ്പുഴയിലേക്ക് ലോഡുമായി പോവുകയായിരുന്നു ലോറി. കോഴിക്കോട്–പാലക്കാട് ദേശീയപാതയിൽനിന്നു കോഴിക്കോട്–തൃശൂർ പാതയിലേക്ക് എളുപ്പമെത്താവുന്ന റോഡാണിത്.

റോഡിന്റെ വീതി കുറവും കുത്തനെയുള്ള ഇറക്കവും കൊടുംവളവുമുള്ള ഈ ഭാഗത്ത് അപകടങ്ങൾ നിത്യസംഭവമാണ്. ഇതിനകം വിവിധ അപകടങ്ങളിലായി നാലുപേർ മരിക്കുകയും ഒട്ടേറെ പേർക്ക് പരുക്കേൽക്കുകയും ചെയ്‍തിട്ടുണ്ട്. അപകടങ്ങൾ തടയുന്നതിന് ശാസ്‍ത്രീയമായ നടപടി വേണമെന്ന മോട്ടോർ തൊഴിലാളി യൂണിയനുകളുടെയും നാട്ടുകാരുടെയും ആവശ്യം ഇതുവരെയും അധികൃതർ ആവശ്യമായ ഗൗരവത്തിലെടുത്തിട്ടില്ല.