കയ്പമംഗലത്തു ബൈക്ക് ജീപ്പിലിടിച്ച് ആതവനാട് സ്വദേശി മരിച്ചു

കയ്പമംഗലം : ദേശീയപാതയിൽ കയ്പമംഗലത്തുണ്ടായ വാഹനാപകടത്തിൽ ബൈക്ക് യാത്രക്കാരനായ മലപ്പുറം സ്വദേശി മരിച്ചു. മലപ്പുറം ആതവനാട് മനപ്പടി നീലാംകുന്ന് അങ്കണവാടിക്കു സമീപം പുതുപ്പറമ്പിൽ വീട്ടിൽ സംഗീത്‌ (25) ആണ് മരിച്ചത്. ചൊവ്വാഴ്ച ഉച്ചയ്ക്ക് ഒരുമണിയോടെ കയ്പമംഗലം അറവുശാലയ്ക്കടുത്തായിരുന്നു അപകടം. വടക്കു ഭാഗത്തുനിന്ന് വരുകയായിരുന്ന ബൈക്ക് മുന്നിൽപ്പോയിരുന്ന ജീപ്പിന്റെ പിന്നിലിടിക്കുകയും നിയന്ത്രണംവിട്ട് മറിയുകയുംചെയ്തു.

ഈ സമയം എതിർദിശയിൽനിന്ന് വന്ന കാർ സംഗീതിനെ ഇടിച്ചുതെറിപ്പിക്കുകയായിരുന്നു. ഉടൻ ആംബുലൻസിൽ കൊടുങ്ങല്ലൂരിലെ സ്വകാര്യ ആശുപത്രിയിലെത്തിച്ചെങ്കിലും മരിച്ചു. കൊടുങ്ങല്ലൂരിലുള്ള സഹോദരന്റെ ഭാര്യവീട്ടിൽ പോയി മടങ്ങുകയായിരുന്നു സംഗീത്. ഛത്തീസ്ഗഢ് ബിലാസ്പുർ ഇന്ത്യൻ കോഫി ഹൗസ് ജീവനക്കാരനാണ്. പത്തുദിവസം മുൻപാണ് നാട്ടിലെത്തിയത്. വിവാഹാന്വേഷണം നടത്തിവരുകയായിരുന്നു. ബുധനാഴ്ച ജോലി സ്ഥലത്തേക്ക്‌ തിരിച്ചുപോകാനിരിക്കെയാണ് അപകടം. അച്ഛൻ: സുന്ദരൻ. അമ്മ: ഗീത. സഹോദരൻ: സന്ദീപ് (ടാക്സി ഡ്രൈവർ, എറണാകുളം).