കരേക്കാട് വീടിന് മുന്നിൽ നിറുത്തിയിട്ട ഓട്ടോ കത്തി നശിച്ച നിലയിൽ

വളാഞ്ചേരി:വീടിനുമുന്നില്‍ നിര്‍ത്തിയിട്ടിരുന്ന ഓട്ടോറിക്ഷ കത്തിനശിച്ച നിലയില്‍ കണ്ടെത്തി. കരേക്കാട് സികെ പാറ സ്വദേശി പൊന്മക്കുഴി ഉണ്ണികൃഷ്ണന്‍റെ ഉടമസ്ഥതയിലുള്ള ഓട്ടോറിക്ഷയാണ് അഗ്നിക്കിരയായത്.പുലര്‍ച്ചെയാണ് വീട്ടുകാര്‍ ഓട്ടോറിക്ഷ കത്തിക്കൊണ്ടിരിക്കുന്നത് കണ്ടത്. തുടര്‍ന്ന് തീയണക്കാനുള്ള ശ്രമങ്ങള്‍ നടത്തി. തീയണക്കാനുള്ള ശ്രമത്തിനിടെ ഉണ്ണികൃഷ്ണന്‍റെ മുഖത്തും പൊള്ളലേറ്റു.സംഭവത്തില്‍ ദുരൂഹതയുണ്ടെന്നാണ് വീട്ടുകാര്‍ പറയുന്നത്. വളാഞ്ചേരി പോലീസ് സ്ഥലത്തെത്തി പരിശോധന നടത്തി. ഉടമസ്ഥന്‍റെ പരാതിയില്‍ പോലീസ് കേസെടുത്ത് അന്വേഷണം ആരംഭിച്ചു.