ആതവനാട് ഡിവിഷൻ ഉപതെരഞ്ഞെടുപ്പ്; ബഷീർ രണ്ടത്താണി യു ഡി എഫ് സ്ഥാനാർഥി

മലപ്പുറം: മലപ്പുറം ജില്ലാ പഞ്ചായത്ത്‌ ആതവനാട് ഡിവിഷനിലേക്ക് നടക്കുന്ന ഉപ തെരഞ്ഞെടുപ്പിൽ മുസ്‌ലിം ലീഗ് (യു. ഡി. എഫ്) സ്ഥാനാർഥിയായി ബഷീർ രണ്ടത്താണിയെ മുസ്‌ലിം ലീഗ് സംസ്ഥാന അധ്യക്ഷൻ പാണക്കാട് സയ്യിദ് സാദിഖലി ശിഹാബ് തങ്ങൾ പ്രഖ്യാപിച്ചു. മുസ്‌ലിംലീഗ് കോട്ടയ്ക്കൽ മണ്ഡലം ജനറൽസെക്രട്ടറിയും മണ്ഡലം യു.ഡി.എഫ്. കൺവീനറുമാണ്. ലീഗ് സംസ്ഥാന, ദേശീയ കൗൺസിൽ അംഗമാണ്. കവിയും ഗാന്ധിയനും സ്വാതന്ത്ര്യസമര സേനാനിയുമായിരുന്ന ഇ. യാഹു മാസ്റ്ററുടെ പൗത്രനാണ്. രണ്ടത്താണി ജി.യു.പി. സ്‌കൂൾ പ്രഥമാധ്യാപകനായിരുന്ന മുഹമ്മദ് ബാവയുടെയും സൈനബയുടെയും പുത്രനും. മാറാക്കര ഗ്രാമപ്പഞ്ചായത്ത് മുൻ ഭരണസമിതി അംഗം ഖൈറുന്നിസയാണ് ഭാര്യ. മക്കൾ: മുഹ്‌സിന, മുബഷീർ.