കാറിടിച്ച് കാക്കഞ്ചേരി കിൻഫ്ര പാർക്കിനു മുന്നിലെ സമരപ്പന്തൽ തകർന്നു

തേഞ്ഞിപ്പലം : ദേശീയപാതയോരത്ത്‌, കാക്കഞ്ചേരി കിൻഫ്ര പാർക്കിനു മുന്നിലെ സമരപ്പന്തലിലേക്ക് നിയന്ത്രണംവിട്ട കാർ ഇടിച്ചുകയറി. അപകടത്തിൽ കാറിലുണ്ടായിരുന്ന രണ്ടു കുട്ടികളുൾപ്പെടെയുള്ള അഞ്ചംഗ കുടുംബം പരിക്കുകളില്ലാതെ രക്ഷപ്പെട്ടു.

ഞായറാഴ്ച രാത്രി പന്ത്രണ്ടരയോടെയാണ് അപകടം. എറണാകുളത്തുനിന്ന് വടകരയിലേക്കു പോകുകയായിരുന്ന കുടുംബം സഞ്ചരിച്ച കാറാണ് അപകടത്തിൽപ്പെട്ടത്. നിയന്ത്രണംവിട്ട കാർ റോഡരികിലെ മരത്തിലിടിച്ചശേഷം തൊട്ടടുത്ത സമരപ്പന്തലിലേക്കു പാഞ്ഞുകയറുകയായിരുന്നു. പന്തലിന്റെ കാലുകൾ തകർന്നതോടെ ഇത് കാറിനു മുകളിലേക്ക് പതിച്ചു.