കാറ്റിൽ തെങ്ങ് കടപുഴകിവീണു

വളാഞ്ചേരി: വളാഞ്ചേരിയിൽ വെള്ളിയാഴ്ച വൈകീട്ട് മൂന്നരയോടെ വീശിയടിച്ച ശക്തമായ കാറ്റിൽ തെങ്ങ് കടപുഴകിവീണ് മൂന്ന് വൈദ്യുതിത്തൂണുകൾ നിലംപൊത്തി. മൂച്ചിക്കൽ ദ്വീപിലായിരുന്നു സംഭവം. ദ്വീപ് റോഡിൽ നിസ്കാരപ്പള്ളിക്ക് സമീപമാണ് അപകടമുണ്ടായത്.
കാറ്റിൽ ആടിയുലഞ്ഞ് റോഡിലേക്കുവീണ തെങ്ങ് വൈദ്യുതിക്കമ്പികളിൽ തങ്ങിനിന്നു. തെങ്ങിന്റെ ഭാരം താങ്ങാനാകാതെ വൈദ്യുതിത്തൂണുകൾ ഓരോന്നായി നിലംപൊത്തി. വൈദ്യുതി നിലച്ചതിനാൽ ആളപായമുണ്ടായില്ല. ഇതുവഴിയുള്ള ഗതാഗതം തടസ്സപ്പെട്ടു.