പോലീസ് സ്റ്റേഷനിൽനിന്ന് രക്ഷപ്പെട്ട പ്രതിയെ പിടികൂടി

വളാഞ്ചേരി : വിലങ്ങുമായി സ്റ്റേഷനിൽനിന്ന് രക്ഷപ്പെട്ട മോഷണക്കേസ് പ്രതിയെ പിടികൂടി. അതിഥിത്തൊഴിലാളി അസം മുരുഗാവ് ജില്ലയിലെ നിഗിൽബേട്ടാ പോലീസ് സ്റ്റേഷൻ പരിധിയിലുള്ള റബിൽ ഇസ്‌ലാ(26)മാണ് വളാഞ്ചേരി പോലീസ് സ്റ്റേഷനിൽനിന്ന് രക്ഷപ്പെട്ടത്.

14-ന് രാവിലെ വളാഞ്ചേരി ഹൈസ്കൂളിനടുത്തുള്ള വീട്ടിൽ മോഷണംനടത്തി രക്ഷപ്പെടാൻ ശ്രമിക്കുന്നതിനിടെ നാട്ടുകാരാണ് ഇയാളെ പിടികൂടി പോലീസിനു കൈമാറിയത്. സ്റ്റേഷനിൽനിന്ന് വൈകുന്നേരത്തോടെ വിലങ്ങുമായി ഇറങ്ങി ഓടിയെന്നാണ് പോലീസിന്റെ വിശദീകരണം. തിരച്ചിലിനൊടുവിൽ 15-ന് അർധരാത്രിയോടെ എറണാകുളം പെരുമ്പാവൂർ ഭാഗത്തുനിന്നാണ് ഇയാളെ വീണ്ടും പിടികൂടിയതെന്ന് പോലീസ് പറഞ്ഞു. അന്വേഷണസംഘത്തിൽ എസ്.ഐ. അബ്ദുൽ അസീസ്, സിവിൽ പോലീസ് ഓഫീസർമാരായ വിനീത് ശ്രീജിത്ത്, വിജയാനന്ദ് എന്നിവരാണ് ഉണ്ടായിരുന്നത്.