സി.പി.എം. വളാഞ്ചേരി ഏരിയാ സമ്മേളനത്തിന് കാവുംപുറത്ത് തുടക്കമായി

വളാഞ്ചേരി :സി.പി.എം. വളാഞ്ചേരി ഏരിയാ സമ്മേളനത്തിന് കാവുംപുറത്ത് തുടക്കമായി. ബുധൻ, വ്യാഴം ദിവസങ്ങളിൽ കാവുംപുറം കോട്ടീരി നാരായണൻ നഗറിൽ (പാറക്കൽ കൺവെൻഷൻ സെന്റർ) നടക്കുന്ന സമ്മേളനത്തിലെ പ്രതിനിധി സമ്മേളനം ജില്ലാ സെക്രട്ടറി ഇ.എൻ. മോഹൻദാസ് ഉദ്ഘാടനം ചെയ്തു.

സമ്മേളനത്തിന്റെ പ്രചാരണാർഥം ചൊവ്വാഴ്ച വൈകുന്നേരം വലിയകുന്നിൽനിന്ന് ഏരിയാ കമ്മിറ്റി അംഗം കെ.പി.എ. സത്താറിന്റെ നേതൃത്വത്തിൽ അത്‌ലറ്റുകളുടെ അകമ്പടിയോടെയുള്ള പതാകജാഥ ഏരിയാ സെക്രട്ടറി കെ.പി. ശങ്കരൻ ഉദ്ഘാടനം ചെയ്തു. വളാഞ്ചേരിയിൽ നിന്ന് ഏരിയാ കമ്മിറ്റി അംഗം എ.എൻ. ജോയ് നയിച്ച റെഡ് വൊളന്റിയർമാരുടെ നേതൃത്വത്തിലുള്ള കൊടിമര ജാഥ ജില്ലാ കമ്മിറ്റി അംഗം കെ. രാമദാസ് ഉദ്ഘാടനം ചെയ്തു. ജാഥകൾ വളാഞ്ചേരി നഗരത്തിൽ സംഗമിച്ച് മഹാറാലിയായി സമ്മേളനനഗരിയിലെത്തിയശേഷം ഏരിയാ സെക്രട്ടറി കെ.പി. ശങ്കരൻ പതാക ഉയർത്തി.