പുഴനമ്പ്രത്ത് അനധികൃതമായി നികത്തിയ വയലിൽ ഡി.വൈ.എഫ്.ഐ. പ്രവർത്തകർ കൊടി നാട്ടി

കുറ്റിപ്പുറം : അനധികൃതമായി നികത്തിയ വയലിൽ ഡി.വൈ.എഫ്.ഐ. പ്രവർത്തകർ കൊടി നാട്ടി. പുഴനമ്പ്രത്ത് നിളയോരം പാർക്ക് റോഡരികിലാണ് സ്വകാര്യ വ്യക്തി വയൽ നികത്തുന്നത്. നേരത്തേ വില്ലേജ് ഓഫീസർ സ്റ്റോപ്പ്‌ മെമ്മോ കൊടുത്തിട്ടും നികത്തൽ തുടർന്നതോടെയാണ് ഡി.വൈ.എഫ്.ഐ. പ്രവർത്തകർ പ്രതിഷേധവുമായി രംഗത്തെത്തിയത്.

അതേസമയം, ഉദ്യോഗസ്ഥരെ സ്വാധീനിച്ചാണ് വയൽനികത്തുന്നതെന്നും ആക്ഷേപമുണ്ട്. രാത്രിയുടെ മറവിലാണ് വയൽനികത്തൽ നടക്കുന്നത്. ഡി.വൈ.എഫ്.ഐ. മേഖലാ കമ്മിറ്റിയുടെ നേതൃത്വത്തിലാണ് നികത്തിയ വയലിൽ കൊടിനാട്ടിയത്. റവന്യൂ അധികൃതർക്ക് പരാതി നൽകിയിട്ടുണ്ടെന്നും തുടർനടപടികൾ സ്വീകരിച്ചില്ലെങ്കിൽ പ്രക്ഷോഭം സംഘടിപ്പിക്കുമെന്നും ഭാരവാഹികൾ അറിയിച്ചു.