അങ്ങാടിപ്പുറം തിരുമാന്ധാംകുന്ന് ക്ഷേത്രത്തിൽ എഴുന്നള്ളിപ്പിന് എത്തിച്ച ആന ഇടഞ്ഞു; പാപ്പാന് പരിക്ക്

അങ്ങാടിപ്പുറം: അങ്ങാടിപ്പുറം തിരുമാന്ധാംകുന്ന് ഭഗവതി ക്ഷേത്രത്തിലെ പൂരത്തോടനുബന്ധിച്ച് എഴുന്നള്ളിപ്പിനായി കൊണ്ടു വന്ന ആന ഇടഞ്ഞു. പതിനൊന്ന് ദിവസം നീണ്ട് നിൽക്കുന്ന പൂരാഘോഷത്തിലെ ഏഴാം പൂര ദിവസമായ ഇന്ന് രാവിലെ ഒമ്പതരയോടെയാണ് സംഭവം.

എഴുന്നള്ളിപ്പിനു മുൻപായി കുളിപ്പിക്കുന്നതിനിടെയാണ് ഗുരുവായൂർ ദാമോദർദാസ് എന്ന ആന ഇടഞ്ഞത്. ആനയുടെ ആക്രമണത്തിൽ പ്രധാന പാപ്പാന് പരുക്കേറ്റു. പാപ്പാനെ സ്വകാര്യ ആശുപത്രിയിൽ പ്രവേശിപ്പിച്ചു. പാപ്പാനെ ആക്രമിച്ച ശേഷം ആന ക്ഷേത്ര പരിസരത്തുകൂടി ഓടി. മറ്റു പാപ്പാൻമാരെ അടുക്കാൻ സമ്മതിച്ചില്ല. ആനയെ മെരുക്കാനായി ഗുരുവായൂരിൽനിന്നു പ്രത്യേക സംഘമെത്തി. ഏകദേശം രണ്ട് മണിക്കൂറിന് ശേഷമാണ് ആനയെ തളക്കാനായത്. തുടർന്ന് ക്ഷേത്രത്തിൻ്റെ വടക്കെ നടയിലുള്ള ഒഴിഞ്ഞ പറമ്പിലേക്ക് ആനയെ മാറ്റി.