വളാഞ്ചേരി മാർക്കറ്റിൽ തീപ്പിടുത്തം; ആളപായമില്ല

വളാഞ്ചേരി: വളാഞ്ചേരി മാർക്കറ്റിൽ തീപിടിത്തം. മാർക്കറ്റിൽ സ്ഥിതി ചെയ്യുന്ന ഹൈദ്രോസിന്റെ ഉടമസ്ഥതയിലുള്ള ഫ്രന്റ്സ് എന്ന മൊത്തവ്യാപാര കേന്ദ്രത്തിലാണ് അല്പ സമയം മുമ്പ് തീപിടുത്തമുണ്ടായത്. ഏകദേശം പതിനൊന്നേകാലോടെയാണ് തീപിടുത്തമുണ്ടായത്.

തീ പിടിക്കാൻ ഉണ്ടായ കാരണം അറിവായിട്ടില്ല. എങ്കിലും ഇടിമിന്നലിൽ നിന്നും ഉണ്ടായ ഷോർട്ട് സർക്യൂട്ടാണ് അപകടകാരണമെന്നാണ് പ്രാഥമിക നിഗമനം. ഒരു പൊട്ടിത്തെറി ശബ്ദം കേട്ടിരുന്നതായി ദൃക്സാക്ഷികൾ പറഞ്ഞു. മാർക്കറ്റിൽ ഉണ്ടായിരുന്നവർ ചേർന്ന് ബക്കറ്റിലും മറ്റുമായി വെള്ളം കോരിയൊഴിച്ച് കെടുത്താൻ ശ്രമിക്കുകയായിരുന്നു. തിരൂരിൽ നിന്ന് രണ്ട് യൂണിറ്റ് ഫയർ ഫോഴ്സ് സ്ഥലത്തെത്തിയിരിക്കുകയാണിപ്പോൾ.

Summary: Fire broke out in a wholesale dealership inside valanchery market