കോട്ടയ്ക്കലിൽ ചെരിപ്പുകടയ്ക്ക് തീപിടിച്ചു

കോട്ടയ്ക്കൽ : കോട്ടയ്ക്കൽ ടൗണിലെ ചെരിപ്പുവ്യാപാരസ്ഥാപനത്തിൽ തീപ്പിടിത്തം. പറപ്പൂർ റോഡിന്‌ എതിർവശത്തുള്ള ഷാഹിന ഷൂ പാലസിന്റെ നാലാം നിലയിലാണ് ചൊവ്വാഴ്ച രാത്രി പതിനൊന്നേമുക്കാലിന് തീപിടിച്ചത്.

ചെരിപ്പുകളും ബാഗുകളും സൂക്ഷിച്ചിരുന്ന ഇവിടെനിന്ന് തീ ഉയരുന്നതു കണ്ട വഴിയാത്രക്കാർ പോലീസിനെയും അഗ്നിരക്ഷാസേനയെയും വിവരം അറിയിക്കുകയായിരുന്നു. മലപ്പുറത്തുനിന്നെത്തിയ രണ്ടു യൂണിറ്റ് അഗ്നിരക്ഷാസേന തീയണച്ചു. താഴത്തെ നിലകളിലേക്കും സമീപത്തെ കെട്ടിടങ്ങളിലേക്കും തീ പടരാത്തത് രക്ഷയായി. കാരണം വ്യക്തമായിട്ടില്ലെന്ന് തീയണയ്ക്കാൻ നേതൃത്വം നൽകിയ ജില്ലാ ഫയർ ഓഫീസർ വി.കെ. ഋത്വീജ് പറഞ്ഞു. സ്കൂൾ തുറക്കുന്നതിനു മുന്നോടിയായി ബാഗുകളുടെയും ചെരിപ്പുകളുടെയും പുതിയ സ്റ്റോക്ക് സൂക്ഷിച്ചിരുന്നു. താഴത്തെ നിലകളിലെ സ്റ്റെയർകേസുകളിലും ഇവ അടുക്കിയിരുന്നു. അഗ്നിരക്ഷാ ഉദ്യോഗസ്ഥർ ഇവ പുറത്തേക്ക് മാറ്റി.