കാറിൽ കട ത്തുകയായിരുന്ന രണ്ടര കിലോ കഞ്ചാവുമായി രണ്ട് പേർ എക്സൈസ് പിടിയിൽ

പെരിന്തൽമണ്: കാറിൽ കടത്തുകയായിരുന്ന രണ്ടര കിലോഗ്രാം കഞ്ചാവുമായി രണ്ടുപേരെ എക്സൈസ് സംഘം പിടികൂടി. നിലമ്പൂർ വഴിക്കടവ് നാരോക്കാവ് കൊടിയിൽ വീട്ടിൽ ശിഹാബുദ്ദീൻ (29), നിലമ്പൂർ എടക്കര അറന്നാടൻ പള്ളിപ്പടിയിലെ പനക്കത്തൊടിക വീട്ടിൽ മൊയ്‍തീൻകുട്ടി (50) എന്നിവരാണു പിടിയിലായത്. പൊന്ന്യാകുർശി ഭാഗത്തുനിന്നു കാറിൽവരികയായിരുന്ന ഇവരെ വാഹന പരിശോധനയ്ക്കിടെയാണ് എക്സൈസ് റേഞ്ച് ഇൻസ്‍പെക്ടർ ആർ.പി.സുജിത്തും സംഘവും പിടികൂടിയത്.

രണ്ടാഴ്‍ചയായി പ്രതികൾ എക്സൈസ് മഫ്‍ടി സ്‍ക്വാഡിന്റെ നിരീക്ഷണത്തിലായിരുന്നു. കാറും കസ്റ്റഡിയിലെടുത്തു. ഒഡീഷയിലെ റായ്ഘട്ടിൽനിന്നു കിലോഗ്രാമിന് 3,000 രൂപ നിരക്കിൽ വാങ്ങിയാണു കഞ്ചാവ് എത്തിക്കുന്നതെന്ന് എക്സൈസ് സംഘം പറഞ്ഞു. ജില്ലയിലെ വിവിധ ഭാഗങ്ങളിൽ 15,000 മുതൽ 20,000 രൂപ നിരക്കിലാണു വിൽപന നടത്തുന്നത്. അസി. എക്സൈസ് ഇൻസ്‍പെക്ടർ സി.എച്ച്.ഹരികുമാർ, പ്രിവന്റീവ് ഓഫിസർമാരായ യു.കുഞ്ഞാലൻകുട്ടി, കെ.എം.ശിവപ്രകാശ്, സിവിൽ എക്സൈസ് ഓഫിസർമാരായ മധുസൂദനൻ, എ.വി.ലെനിൻ, റിഷാദലി, അനീഷ്, വിപിൻ, ഇന്ദു, സിന്ധു എന്നിവരടങ്ങിയ സംഘമാണു പരിശോധന നടത്തിയത്.