കാത്തിരിപ്പിനൊടുവിൽ വീണ്ടും കൺതുറന്നു വട്ടപ്പാറയിലെ ഹൈമാസ്റ്റ് ലൈറ്റ്

വളാഞ്ചേരി: അടിക്കടി അപകട വാർത്തകളാൽ കുപ്രസിദ്ധിയാർജ്ജിച്ച വട്ടപ്പാറയിലെ ഹൈമാസ്റ്റ് ലൈറ്റ് വീണ്ടും പ്രവർത്തനം തുടങ്ങി. കഴിഞ്ഞ മാസം ലൈറ്റ് നന്നാക്കുവാനുള്ള ടെണ്ടർ നഗരസഭ വിളിച്ചിരുന്നു. ഇതിനടിസ്ഥാനത്തിലാണ് ലൈറ്റ് സമയബന്ധിതമായി നന്നാക്കുകയും തെളിയിക്കുകയും ചെയ്തത്.

ലൈറ്റ് തെളിഞ്ഞതോടെ ചരക്ക് വാഹനങ്ങൾ അടക്കമുള്ള വലിയ വാഹനങ്ങളിലെ ഡ്രൈവർമാർക്ക് വളവുകളെ കുറിച്ച് ഒരു ധാരണ വരുത്താൻ സഹായിക്കുന്നു. മുൻ‌പ്രാവശ്യത്തെപ്പോലെ ലൈറ്റ് പാതിവഴിയിൽ കൺ‌ചിമ്മാതെയിരിക്കണമെന്ന പ്രാർഥനയിലാണ് പ്രദേശവാസികളിപ്പോൾ.