കോട്ടക്കലിൽ ലഹരി ഉൽപ്പന്നങ്ങളുമായി കാടാമ്പുഴ സ്വദേശി യുവാവ് പിടിയിൽ

കോട്ടക്കൽ: ടൂറിസ്റ്റ് ഹോമിൽ മുറിയെടുത്ത് മയക്കുമരുന്ന് വിൽപ്പന നടത്തുന്നിനിടെ യുവാവ് എക്സൈസിന്റെ പിടിയിലായി. കാടാമ്പുഴ സ്വദേശി പുല്ലാട്ടിൽ വീട്ടിൽ മുഹമ്മദ് ഷരീഫിനെ(25)യാണ് കോട്ടയ്ക്കലിലെ സ്വകാര്യ ടൂറിസ്റ്റ് ഹോമിൽനിന്ന് വെള്ളിയാഴ്ച കുറ്റിപ്പുറം എക്സൈസ് സംഘം അറസ്റ്റുചെയ്തത്. ഇയാളിൽനിന്ന് 80 മില്ലി എം.ഡി.എം.എ.യും വീട്ടിൽനിന്ന് 3.9 കിലോഗ്രാം കഞ്ചാവും പിടിച്ചെടുത്തു.

ഹോട്ടലുകൾ, ടൂറിസ്റ്റ് ഹോമുകൾ എന്നിവ കേന്ദ്രീകരിച്ച് മുഹമ്മദ് ഷരീഫ് മയക്കുമരുന്ന് വിൽപ്പന നടത്തുന്നതായുള്ള വിവരത്തിന്റെ അടിസ്ഥാനത്തിലാണ് എക്സൈസ് സംഘം പരിശോധന നടത്തിയത്. എക്സൈസ് ഇൻസ്‌പെക്ടർ സജീവ്‌കുമാർ, പ്രിവന്റീവ് ഓഫീസർമാരായ യു. കുഞ്ഞാലൻകുട്ടി, ടി. പ്രജോഷ്‌കുമാർ, മുസ്തഫ ചോലയിൽ, സിവിൽ എക്സൈസ് ഓഫീസർമാരായ മുഹമ്മദാലി, കെ. രാജീവ്, കെ. ഷിനോജ് എന്നിവരടങ്ങിയ സംഘമാണ് പിടികൂടിയത്. പ്രതിയെ ശനിയാഴ്‌ച തിരൂർ മജിസ്ട്രേറ്റ് കോടതിയിൽ ഹാജരാക്കും.