കാടാമ്പുഴ ഭഗവതീക്ഷേത്രത്തിലെ ദ്രവ്യകലശചടങ്ങുകൾ തുടങ്ങി

കാടാമ്പുഴ: കാടാമ്പുഴ ഭഗവതീക്ഷേത്രത്തിലെ ദ്രവ്യകലശചടങ്ങുകൾ തുടങ്ങി. തിങ്കളാഴ്ച വൈകുന്നേരം ആചാര്യവരണത്തോടെയാണ് തുടക്കം. ദേവസ്വം ട്രസ്റ്റി ഡോ. എം.വി. രാമചന്ദ്രവാര്യർ, എക്‌സിക്യുട്ടീവ് ഓഫീസർ ടി. ബിനേഷ്‌കുമാർ, ദേവസ്വം മാനേജർ പി.കെ. രവി, എൻജിനീയർ കെ. വിജയകൃഷ്ണൻ, ക്ഷേത്രം സൂപ്രണ്ട് പി. വിക്രമൻ എന്നിവർ പങ്കെടുത്തു.

തന്ത്രി അണ്ടലാടിമന ദിവാകരൻ നമ്പൂതിരിപ്പാടിന്റെ മുഖ്യകാർമികത്വത്തിലാണ് ദ്രവ്യകലശചടങ്ങുകൾ നടക്കുന്നത്. അണ്ടലാടിമന പരമേശ്വരൻ നമ്പൂതിരിപ്പാട്, ദിനേശൻ നമ്പൂതിരിപ്പാട്, അണിമംഗലം വാസുദേവൻ നമ്പൂതിരിപ്പാട്, കാടാമ്പുഴ ഭഗവതീക്ഷേത്രം മേൽശാന്തി ഹരി എമ്പ്രാന്തിരി എന്നിവർ സഹകാർമികത്വം വഹിക്കും. നവംബർ നാലിന് സമാപിക്കും.