കുറ്റിപ്പുറം ചെല്ലൂർ കുന്നിൽ മാലിന്യശാല സ്ഥാപിക്കാനുള്ള നീക്കത്തിനെതിരെ നാട്ടുകാർ

കുറ്റിപ്പുറം : റവന്യൂവിഭാഗത്തിന്റെ അധീനതയിലുള്ള ചെല്ലൂർകുന്നിൽ സർക്കാർ മാലിന്യശാല സ്ഥാപിക്കാനുള്ള നീക്കത്തിനെതിരേ പ്രതിഷേധവുമായി നാട്ടുകാർ. നടുവട്ടം വില്ലേജിലെ മിച്ചഭൂമിയായ 56 ഏക്കർ വരുന്ന ചെല്ലൂർകുന്നിൽ എട്ട് ഏക്കർ ഭൂമിയാണ് മാലിന്യശാല സ്ഥാപിക്കാൻ റവന്യു വകുപ്പ് വിട്ട് നൽകിയിരിക്കുന്നത്.

നിലവിൽ മാലിന്യംതള്ളിയ ചെങ്കൽക്വാറിക്ക് സമീപത്തായാണ് ഇതിന് സ്ഥലം അനുവദിച്ചിരിക്കുന്നത്. ചെങ്കൽക്വാറിയിലെ മാലിന്യം കത്തുന്നതിന്റെ ദുരിതം ഏതാനും ദിവസങ്ങളായി അനുഭവിക്കുന്ന ചെല്ലൂർകുന്ന് നിവാസികൾ പുതിയ മാലിന്യശാല സ്ഥാപിക്കുന്നതിനെതിരേ സമരരംഗത്തിറങ്ങുമെന്ന് പ്രഖ്യാപിച്ചിട്ടുണ്ട്.