കുഴൽപ്പണം തട്ടിയ കേസ്; പ്രതി ഒരു വർഷത്തിനു ശേഷം കുറ്റിപ്പിറം പോലീസിൻ്റെ പിടിയിൽ

കുറ്റിപ്പുറം : കുഴൽപ്പണം തട്ടിയെടുത്ത കേസിൽ ഒരു വർഷത്തിനുശേഷം ഒരാൾ പോലീസ് പിടിയിലായി. കടകശ്ശേരിയിൽവെച്ച് കഴിഞ്ഞവർഷം കുഴൽപ്പണവുമായി വന്നയാളെ തട്ടിക്കൊണ്ടുപോയി പണം കവർന്ന കേസിലാണ് കടകശ്ശേരി ചാക്കയിൽ അക്ബറിനെ(35) കുറ്റിപ്പുറം സി.ഐ. ശശീന്ദ്രൻ മേലേയിൽ അറസ്റ്റ് ചെയ്തത്.

കടകശ്ശേരി ഭാഗത്ത് കുഴൽപ്പണം വിതരണം ചെയ്യാനെത്തിയ മലപ്പുറം പടിഞ്ഞാറ്റുമുറി സ്വദേശിയായ യുവാവിനെ പിടികൂടി കണ്ണുകെട്ടി കാറിൽ കയറ്റി മർദ്ദിച്ചവശനാക്കിയതിനുശേഷം പണം കവർന്ന് പാലക്കാട് ജില്ലയിലെ കോങ്ങാട് ഉപേക്ഷിക്കുകയായിരുന്നു. തട്ടിക്കൊണ്ടുപോകാൻ ഉപയോഗിച്ച കാർ പിന്നീട് പോലീസ് പാലക്കാട് ഭാഗത്തുനിന്ന് പിടിച്ചെടുത്തിരുന്നു. ഈ കേസിലെ അക്ബറിന്റെ കൂട്ടുപ്രതിയായ കോങ്ങാട് പൂളക്കുണ്ട് വിജേഷിനെ (24) നേരത്തേ പോലീസ് അറസ്റ്റ് ചെയ്തിരുന്നു. കേസിലെ മറ്റ് പ്രതികൾക്ക് വേണ്ടിയുള്ള അന്വേഷണം ഊർജിതമാക്കിയതായി പോലീസ് അറിയിച്ചു.