കരിപ്പോള്‍ സ്വദേശി ഹെറോയിനുമായി പിടിയില്‍
വളാഞ്ചേരി: വിദ്യാര്‍ഥികള്‍ക്കിടയില്‍ വിതരണം ചെയ്യാന്‍ കൊണ്ടു വന്ന അറുപതു ഗ്രാം ഹെറോയിനുമായി യുവാവ് പിടിയില്‍.വളാഞ്ചേരി ആതവനാട് കരിപ്പോള്‍ ചാവടിപ്പറമ്പില്‍ ഷാജഹാനാ(31)ണ് കുറ്റിപ്പുറം എക്‌സൈസിന്റെ പിടിയിലായത്. മലപ്പുറം ഡെപ്യൂട്ടി എക്‌സൈസ് കമ്മീഷണര്‍ വി.ആര്‍. അനില്‍കുമാറിന് വളാഞ്ചേരി, കുറ്റിപ്പുറം ഭാഗങ്ങളില്‍ ഹെറോയി
നിന്റെ വില്പനയും വിദ്യാര്‍ഥികള്‍ക്കിടയില്‍ ഇതിന്റെ വ്യാപകമായ ഉപയോഗവും നടക്കുന്നുണ്ടെന്ന് രഹസ്യവിവരം കിട്ടിയിരുന്നു. ഇതിന്റെയടിസ്ഥാനത്തില്‍ കഴിഞ്ഞ ഒന്നരമാസമായി എക്‌സൈസ് ഷാഡോ ടീം നടത്തിയ അന്വേഷണമാണ് ഇയാളെ പിടികൂടാന്‍ സഹായിച്ചത്.
വിദ്യാര്‍ഥികള്‍ക്ക് ഇയാള്‍ ഹെറോയിന്‍ നല്‍കുന്നത് നിരീക്ഷിച്ച സംഘം ആവശ്യക്കാരെന്ന വ്യാജേന സമീപിച്ച് കച്ചവടമുറപ്പിച്ച് പിടികൂടുകയായിരുന്നു. ഷാജഹാനെ ചോദ്യംചെയ്തതില്‍ നിന്ന് ഹെറോയിന്‍ ലഭിക്കുന്ന കേന്ദ്രവും വിതരണക്കാരേയും കുറിച്ച് വിവരം ലഭിച്ചതായി കമ്മീഷണര്‍ അനില്‍കുമാര്‍ പറഞ്ഞു. ഈ കണ്ണിയിലുള്ളവരേയും കൂടി ഉള്‍പ്പെടുത്തി തുടരന്വേഷണം നടത്തുമെന്നും അദ്ദേഹം അറിയിച്ചു.
മാസങ്ങള്‍ക്കു മുമ്പ് രണ്ടു കിലോ കഞ്ചാവുമായി പിടിയിലായ ഇയാള്‍ ജാമ്യത്തിലിറങ്ങിയതാണ്. കുറ്റിപ്പുറം റെയ്ഞ്ചില്‍ ഇതിന് മുമ്പ് 427ഗ്രാം ഹാഷിഷ് ഓയില്‍ പിടികൂടിയിരുന്നു. കൂടാതെ ഈ വര്‍ഷം 17 കി.ഗ്രാം കഞ്ചാവും 34ഗ്രാം നൈട്രസപാം ഗുളികകളും 38 ഗ്രാം ഹെറോയിനും പിടികൂടിയിട്ടുണ്ട്.
എക്‌സൈസ് ഇന്‍സ്‌പെക്ടര്‍ രാജേഷ് ജോണ്‍, പ്രിവന്റീവ് ഓഫീസര്‍ രാജേഷ്, സി.ഇ.ഒമാരായ ഷിബുശങ്കര്‍, രാജീവ് ഹംസ, സജിത്ത് മനോജന്‍ എന്നിവര്‍ സംഘത്തിലുണ്ടായിരുന്നു.
വളാഞ്ചേരി ഓൺലൈൻ വാർത്തകൾ വാട്സാപ്പിൽ ലഭിക്കാൻ Click Here.
വളാഞ്ചേരി ഓൺലൈൻ ഇപ്പോൾ ടെലഗ്രാമിലും ലഭ്യമാണ്. സബ്സ്ക്രൈബ് ചെയ്യൂ Click Here
