തേഞ്ഞിപ്പലത്ത് ഒരേ നമ്പർ പ്ലേറ്റ് വച്ച് രണ്ട് ജെ.സി.ബികൾ; കയ്യോടെ പൊക്കി എം.വി.ഡി

മലപ്പുറം: കർണാടക രജിസ്‌ട്രേഷനുള‌ള ജെസിബിയുടെ നമ്പർ പ്ളേറ്റ് മാറ്റി കേരള രജിസ്‌ട്രേഷൻ വാഹനത്തിന്റെ നമ്പ‌ർ പ്ളേറ്റ് വച്ച് ഉപയോഗിച്ചു. മലപ്പുറത്ത് തേഞ്ഞിപ്പലത്ത് അമ്പലപ്പടിയിലും ദേവതിയാലും ഉപയോഗിക്കുകയായിരുന്ന ഒരേ രജിസ്‌ട്രേഷനിലുള‌ള രണ്ട് ജെസിബികളും പിടികൂടി. മലപ്പുറം അസിസ്‌റ്റന്റ് മോട്ടോർ വെഹിക്കിൾ ഇൻസ്‌പെക്‌ടർമാരുടെ നേതൃത്വത്തിലാണ് ഇരുവാഹനങ്ങളും പിടിച്ചെടുത്തത്. എംവിഡി എൻഫോഴ്‌സ്മെന്റിന് കിട്ടിയ രഹസ്യ വിവരത്തെ തുടർന്നാണ് പരിശോധന നടത്തിയത്.

ഒരേ വ്യക്തിയുടെ കീഴിലുള‌ളതാണ് രണ്ട് ജെസിബിയെന്നും അന്വേഷണത്തിൽ വ്യക്തമായിട്ടുണ്ട്. നികുതി വെട്ടിക്കാനും നിയമലംഘന പ്രവർത്തനം നടത്താനുമാണ് ഇത്തരത്തിൽ ഒരേ നമ്പരിൽ വാഹനങ്ങൾ സാധാരണ ഉപയോഗിക്കുന്നതെന്നാണ് വിവരം. അസി.വെഹിക്കിൾ ഇൻസ്‌പെക്‌ടർമാർ ഫിറോസ് ബിൻ ഇസ്‌മായിൽ, കെ.ആർ ഹരിലാൽ, എസ്.സുനിൽ രാജ്, പി.കെ സയ്യിദ് മഹമൂദ്, വിജീഷ് വളേരി എന്നവരടങ്ങിയ രണ്ട് സ്‌ക്വാഡാണ് പരിശോധനകൾ നടത്തിയത്.