പറമ്പത്തുകാവ് വേല ആഘോഷിച്ചു

വളാഞ്ചേരി : വെണ്ടല്ലൂർ പറമ്പത്തുകാവ് ഭഗവതീക്ഷേത്രത്തിലെ വേല ആഘോഷിച്ചു. മുപ്പത്തിയാറ് ജോഡി ഇണക്കാളകളാണ് ഇത്തവണ കാവിലെത്തിയത്. ഉച്ചയ്ക്ക് രണ്ടരയ്ക്ക് മലയരുടെ തേര് കാവിലെത്തി ഭഗവതിയെ വലംവെച്ചു. തുടർന്ന് പൈങ്കണ്ണൂർ ദേശത്തിന്റെ കാളയും പിന്നാലെ വെണ്ടല്ലൂർ ദേശത്തിന്റെ കാളയും എത്തി.

മേൽശാന്തി മൂത്തമലമന രാജീവ് നമ്പൂതിരി, പരത നന്ദൻ നമ്പൂതിരി, മംഗലത്ത്മന വിജയൻ നമ്പൂതിരി, മൂത്തമലമന വിഷ്ണു നമ്പൂതിരി തുടങ്ങിയവർ നേതൃത്വം നൽകി. പാരമ്പര്യട്രസ്റ്റി മൂത്തേടത്ത്മന പ്രകാശൻ നമ്പൂതിരിയും സംബന്ധിച്ചു.