വൈക്കത്തൂർ ഉത്സവം കൊടിയേറി

വളാഞ്ചേരി : വൈക്കത്തൂർ ഉത്സവത്തിന് തന്ത്രി കിഴക്കിനിയേടത്ത് മേക്കാട്ട് മാധവൻ നമ്പൂതിരി കൊടിയേറ്റി. മേൽശാന്തി മുണ്ടക്കിഴി കാലടി നാരായണൻ നമ്പൂതിരി, കീഴ്മന രാജേഷ് എമ്പ്രാന്തിരി, ചെറുശേരി ഗൗതം നമ്പൂതിരി എന്നിവർ സഹായികളായി.

രാവിലെ ശുദ്ധിക്രിയകൾക്കുശേഷം അഷ്ടദ്രവ്യ ഗണപതിഹോമം, കലവറ നിറയ്ക്കൽ എന്നിവയുണ്ടായി. വൈകുന്നേരം ദീപാരാധന, സമ്പൂർണ നിറമാല, ആചാര്യവരണം, മുളയിടൽ എന്നിവയും നടന്നു. അത്താഴപൂജക്കുശേഷം ശ്രീഭൂതബലിയുമുണ്ടായിരുന്നു. കോവിഡ് വ്യാപനം രൂക്ഷമായ സാഹചര്യത്തിൽ ഉത്സവത്തിന്റെ ആദ്യദിവസം നടത്താനിരുന്ന സംഗീതയുഗ്മകവും തുടർന്നുള്ള ദിവസങ്ങളിലെ കഥകളി, തിരുവാതിരക്കളി, മോഹിനിയാട്ടം എന്നീ പരിപാടികളും ഉപേക്ഷിച്ചതായി സംഘാടകർ അറിയിച്ചു.