കരിപ്പോളിൽ സ്വകാര്യ ബസ് കാറിനു പിറകിലിടിച്ചു

ആതവനാട്: ദേശീയപാത 66ലെ കരിപ്പോളിൽ കാറിന് പിറകിൽ നിയന്ത്രണം വിട്ട സ്വകാര്യ ബസിടിച്ചു. ഇന്ന് രാവിലെ ഒമ്പത് മണിയോടെ കരിപ്പോളിലെ ഇന്ത്യൻ ഓയിൽ പെട്രോൾ പമ്പിന് സമീപമായാണ് അപകടമുണ്ടായത്. തൃശൂരിൽ നിന്ന് കോഴിക്കോട്ടേക്ക് പോവുകയായിരുന്ന ശാസ്ത ബസാണ് അതേ ദിശയിൽ സഞ്ചരിക്കുകയായിരുന്ന കെ.എൽ-46-ആർ-495 നമ്പർ ഹ്യുണ്ടായ് ഇയോൺ കാറിന് പിറകിലിടിക്കുകയായിരുന്നു. കാറിനെ മറികടക്കാനുള്ള ശ്രമത്തിനിടെയാണ് അപകടമുണ്ടായതെന്ന് പ്രദേശവാസികൾ പറഞ്ഞു. അപകടത്തിൽ ഇരു വാഹനങ്ങളിലെയും യാത്രക്കാർക്ക് പരിക്കുകളില്ല. അപകടത്തെ തുടർന്ന് ദേശീയപാതയിൽ ഇരുപത് മിനുട്ടോളം ഗതാഗതക്കുരുക്കുണ്ടായി. ഹൈവേ പോലീസെത്തി മേൽനടപടികൾ സ്വീകരിച്ചു.