കുളമംഗലത്ത് വലയിൽ കുടുങ്ങിയ മലമ്പാമ്പിനെ രക്ഷിച്ചു

വളാഞ്ചേരി: വലയിൽ കുടുങ്ങിയ മലമ്പാമ്പിനെ രക്ഷിച്ചു. പാമ്പുപിടിത്തക്കാരനും വിഷചികിത്സകനുമായ കൈപ്പുറം അബ്ബാസെത്തിയാണ് വളാഞ്ചേരി കുളമംഗലത്തെ കടുങ്ങാട്ചിറ തോട്ടിൽ മീൻപിടിത്തക്കാർ വിരിച്ച വലയിൽ കുടുങ്ങിയ പാമ്പിനെ രക്ഷിച്ചത്.

വലയിൽ കുടുങ്ങിയ പാമ്പിന്റെ തല മുകളിൽ പൊന്തിനിന്നതിനാലാണ് നാട്ടുകാരുടെ ശ്രദ്ധയിൽപ്പെട്ടത്. വളാഞ്ചേരി പോലീസ് സ്റ്റേഷനിൽ വിവരമറിയിച്ചതിനെത്തുടർന്നാണ് രക്ഷാപ്രവർത്തനങ്ങൾ നടത്തിയത്.

രണ്ടരമീറ്റർ നീളമുള്ള പെൺപാമ്പാണ് വലയിൽ കുടുങ്ങിയത്. മീൻ പിടിത്തക്കാർ വിരിക്കുന്ന വലയിൽ മലമ്പാമ്പുകൾ കുടുങ്ങി ചാവുന്നത് സാധാരണമായിട്ടുണ്ടെന്ന് പോലീസ് പറഞ്ഞു.