ഇരുചക്ര വാഹനങ്ങളിൽ മണൽക്കടത്ത്; കുറ്റിപ്പുറത്ത് മൂന്ന് പേർ പിടിയിൽ

കുറ്റിപ്പുറം : ഇരുചക്രവാഹനങ്ങളിൽ മണൽക്കടത്ത് നടത്തുന്ന സംഘത്തിലെ മൂന്നുപേർ അറസ്റ്റിൽ. വെള്ളാഞ്ചേരി കരിമ്പവളപ്പിൽ റിനു കൃഷ്ണൻ (27), കരിമ്പവളപ്പിൽ റിനീഷ് (23), പടിക്കൽ വളപ്പിൽ പ്രമോദ് (42) എന്നിവരെയാണ് കുറ്റിപ്പുറം പോലീസ് അറസ്റ്റുചെയ്തത്. വെള്ളാഞ്ചേരി മാമ്പി സ്റ്റേഡിയത്തിനടുത്ത് ചൊവ്വാഴ്‌ച രാത്രി പോലീസ് നടത്തിയ പരിശോധനയ്ക്കിടെയാണ് ഇവർ പിടിയിലായത്.

കഴിഞ്ഞദിവസം വെള്ളാഞ്ചേരി ഭാഗത്ത് മണലുമായി വന്ന ലോറി പോലീസ് പിടികൂടിയിരുന്നു. ലോറിയിൽ മണൽ എത്തിക്കുന്നവരെക്കുറിച്ചുള്ള അന്വേഷണത്തിനിടെയാണ് പുഴയിൽനിന്ന് ബൈക്കിൽ മണൽ എത്തിച്ചുകൊണ്ടിരുന്ന ഇവർ പിടിയിലാകുന്നത്. ഇവരിൽനിന്ന് അഞ്ച് ബൈക്കുകളും പിടികൂടിയിട്ടുണ്ട്. സംഘത്തിലെ മറ്റുള്ളവരെക്കുറിച്ച് വിവരം ലഭിച്ചിട്ടുണ്ടെന്നും അവരെ ഉടൻ പിടികൂടുമെന്നും സി.ഐ. ശശീന്ദ്രൻ മേലേയിൽ അറിയിച്ചു. എസ്.ഐ. ജിഷിൽ, സി.പി.ഒ.മാരായ നിഷാദ്, വിജേഷ് എന്നിവരാണ് സംഘത്തെ പിടികൂടിയത്.