അനധികൃത മണൽഖനനം; ചെമ്പിക്കലും രാങ്ങാട്ടുരും ലോറികൾ പിടിച്ചെടുത്തു

കുറ്റിപ്പുറം: മഫ്ടിയിൽ എത്തിയ സി.ഐ.യും സംഘവും ഭാരതപ്പുഴയിൽനിന്ന് മണൽക്കടത്ത് നടത്തിയ രണ്ട് ടിപ്പർ ലോറികൾ പിടിച്ചെടുത്തു. വെള്ളിയാഴ്ച പുലർച്ചെ ചെമ്പിക്കൽ, രാങ്ങാട്ടൂർ എന്നിവിടങ്ങളിലെ കടവുകളിൽനിന്നാണ് കുറ്റിപ്പുറം പോലീസ് ഇൻസ്പെക്ടർ പി.എം. ഷമീറിന്റെ നേതൃത്വത്തിലുള്ള മഫ്ടി പോലീസ് സംഘം ലോറികൾ പിടിച്ചത്. മണൽക്കടത്ത് സംഘം ഓടി രക്ഷപ്പെട്ടതിനാൽ പിടികൂടാനായില്ല. ഭാരതപ്പുഴയിലെ കടവുകളിൽ പുലർച്ചെ മണൽക്കടത്ത് സംഘങ്ങൾ സജീവമാകുന്നത് ശ്രദ്ധയിൽപ്പെട്ടതിനെത്തുടർന്നാണ് സി.ഐ.യും സംഘവും ഇവരെ നേരിടാൻ മഫ്ടിയിൽ രംഗത്തിറങ്ങിയത്. വരും ദിവസങ്ങളിൽ നടപടി തുടരുമെന്ന് സി.ഐ. അറിയിച്ചു.