ശിഹാബ് തങ്ങൾ ഡയാലിസിസ് സെൻറർ നാടിന് സമർപ്പിച്ചു

വളാഞ്ചേരി: ശിഹാബ് തങ്ങൾ ഡയാലിസിസ് സെൻറർ നാടിന് സമർപ്പിച്ചു. വളാഞ്ചേരിയിലെ പൊതു സമൂഹത്തിന്റെ നിറസാന്നിദ്ധ്യത്തിൽ പാണക്കാട് ഹൈദരലി ശിഹാബ് തങ്ങൾ നിസാർ ഹോസ്പിറ്റലിൽ പ്രവർത്തനം തുടങ്ങുന്ന ഡയാലിസിസ് സെൻറർ ഉദ്ഘാടനം ചെയ്തു. ഇ.ടി.മുഹമ്മദ്ബഷീർ എംപി, എംഎൽഎമാരായ വി.ടി.ബൽറാം, കെ.കെ.ആബിദ്ഹുസൈൻ തങ്ങൾ, മുഹമ്മദ് മുഹ്‍സിൻ എന്നിവർ പങ്കെടുത്തു.

നിർധനരായ രോഗികൾക്ക് സെന്ററിൽ ഡയാലിസിസ് സൗജന്യമാണ്. ചെലവ് ശിഹാബ് തങ്ങൾ ചാരിറ്റബിൾ ട്രസ്റ്റ് വഹിക്കും. അഞ്ചു ഡയാലിസിസ് യന്ത്രങ്ങൾ ദിവസവും രണ്ടു ഷിഫ്റ്റുകളായി പ്രവർത്തിക്കും. മാസത്തിൽ 260 ഡയാലിസിസ് നടത്തുന്നതിനുള്ള സൗകര്യമുണ്ട്. സെന്ററിന്റെ നേതൃത്വത്തിൽ സന്നദ്ധ സംഘടനകളുടെ സഹകരണത്തോടെ മേഖലയിലെ ഏഴു കേന്ദ്രങ്ങളിൽ നടത്തിയ വൃക്കരോഗ നിർണയ ക്യാംപുകളിൽ കണ്ടെത്തിയവർക്കാണ് ആദ്യഘട്ടത്തിൽ ഡയാലിസിസ്. നാളെ ഇവർക്കുള്ള സ്ക്രീനിങ് നടത്തും.

ബുധൻ മുതൽ സെന്ററിന്റെ പ്രവർത്തനം പൂർണമായും തുടങ്ങുമെന്ന് കെ.കെ.ആബിദ്ഹുസൈൻ തങ്ങൾ എംഎൽഎ, സി.എച്ച്.അബൂയൂസഫ് ഗുരുക്കൾ, ഡോ. എൻ.എം.മുജീബ് റഹ്മാൻ, ട്രസ്റ്റ് ചെയർമാൻ അഷറഫ് അമ്പലത്തിങ്ങൽ, ചീഫ് കോഓർഡിനേറ്റർ സലാം വളാഞ്ചേരി എന്നിവർ അറിയിച്ചു.