അത്തിപ്പറ്റയിൽ ടാങ്കർ ലോറിയും ജീപ്പും കൂട്ടിയിടിച്ച് ജീപ്പ് ഡ്രൈവർക്ക് പരുക്ക്

പൂക്കാട്ടിരി: പൂക്കാട്ടിരി അത്തിപ്പറ്റയിൽ ടാങ്കർ ലോറിയും ജീപ്പും കൂട്ടിയിടിച്ച് ജീപ്പ് ഡ്രൈവർക്ക് പരുക്ക്. തിങ്കളാഴ്ച്ച രാത്രി 10.30 ഓടേയാണ് അപകടം നടന്നത്. ജീപ്പ് ഡ്രൈവറായ ചോർണിയിൽ അബ്ദുറഷീദിനാണ് പരുക്ക് പറ്റിയത്. വളാഞ്ചേരിയിലെ സ്വകാര്യ ആശുപത്രിയിൽ പ്രവേശിപ്പിച്ച റഷീദിന്റെ പരുക്ക് ഗുരുതരമല്ല.

അത്തിപ്പറ്റയിൽ നിന്നും പലചരക്ക് കടയടച്ച് പഴയ ചന്തയിലുള്ള വീട്ടിലേക്ക് പോവുമ്പോൾ എതിരെ വന്ന ടാങ്കർ ലോറി ഇടിക്കുകയായുന്നു. ഇടിയുടെ ആഘാതത്തിൽ ജീപ്പ് 2 തവണ മറിഞ്ഞാണ് തൊട്ടടുത്തുള്ള ട്രാൻസ്ഫോമറിന്റെ അടുത്ത് വന്ന് നിന്നത്. ട്രാൻസ്ഫോമറിൽ വന്നിടിക്കാത്തതിനാൽ വൻ ദുരന്തമാണ് ഒഴിവായത്. അമിത വേഗതയിലായിരുന്നു ടാങ്കർ ലോറി വന്നിരുന്നതെന്ന് ദൃക്സാക്ഷി പറഞ്ഞു. അപകടം നടന്ന സ്ഥലത്ത് നിന്നും ഏറെ ദുരം ചെന്നാണ് ടാങ്കർ ലോറി നിർത്തിയത്.