പെരിന്തൽമണ്ണയിൽ മോട്ടാർവാഹന പരിശോധനാ സംഘത്തിൻറെ വാഹനത്തിലേക്ക് ടാങ്കർ ലോറി ഇടിച്ചു കയറി

പെരിന്തൽമണ്ണ : പെരിന്തൽമണ്ണയിൽ മോട്ടാർവാഹന പരിശോധനാ സംഘത്തിൻറെ വാഹനമടക്കം നിരവധിവാഹനങ്ങളിലേക്ക് നിയന്ത്രണം വിട്ട ടാങ്കർ ലോറി ഇടിച്ചു കയറി. ഇന്ന് കാലത്ത് മാനത്ത് മംഗലത്താണ് സംഭവം. ഇവിടെ ഡ്രൈവിംഗ് ടെസ്റ്റിനെത്തിയ വരുടെ ബൈക്കുകളും വാഹന പരിശോധനാ സംഘത്തിൻറെ വാഹനവും അടക്കമുള്ളവയിലേക്ക് ലോറി ഇടിച്ചു കയറുകയായിരുന്നു. അപകടത്തിൽ ഡ്രൈവിംഗ് ടെസ്റ്റിനെത്തിയ മൂന്ന് പേർക്ക് നിസാര പരിക്കുകളേറ്റു. മാനത്ത് മംഗലം ബൈപ്പാസ് എം.യു.എം ഓഡിറ്റോറിയത്തിന് മുന്നിൽ ഇന്ന് രാവിലെ ഉണ്ടായ അപകടത്തിൽ അഞ്ചോളം ബൈക്കുകളും തകർന്നിട്ടുണ്ട്. രാവിലെ പത്തുമണിക്ക് പാലക്കാട് ഭാഗത്തേക്ക് പോകുകയായിരുന്ന ലോറിയുടെ അപകടകരമായ വരവ് കണ്ട് സമീപത്തുള്ളവർ ഓടി മാറിയതിനാലാണ് വൻ ദുരന്തം ഒഴിവായതെന്ന് ദൃക്‌സാക്ഷികൾ പറഞ്ഞു.