ഡൗൺലോഡ് ചെയ്തെടുക്കുന്ന ജനന–മരണ സർട്ടിഫിക്കറ്റുകൾ ഇനി മുതൽ ആധികാരിക രേഖ

ജനന, മരണ, വിവാഹ സർട്ടിഫിക്കറ്റുകൾ ഇനി ഡൗൺലോഡ് ചെയ്തെടുക്കാം.ബാർ കോഡോടു കൂടിയ ഇത്തരം രേഖകൾ ആധികാരിക രേഖയായി ഉപയോഗിക്കാനാകുമെന്ന് പ്രിൻസിപ്പൽ സെക്രട്ടറി ടി.കെ.മനോജ് കുമാർ പുറത്തിറക്കിയ ഉത്തരവിൽ പറയുന്നു. വിവാഹ റജിസ്ട്രേഷൻ രേഖകളും ഇത്തരത്തിൽ ലഭ്യമാകും.

നേരത്തേ പഞ്ചായത്തിൽ അപേക്ഷ നൽകി പിന്നീടെത്തി രേഖ കൈപ്പറ്റണം. ഇനി അപേക്ഷ സമർപ്പിച്ചാൽ രണ്ടു ദിവസത്തിനകം ഓൺലൈൻ വഴി ലഭ്യമാകും. ഇത് ഡൗൺലോഡ് ചെയ്തെടുത്ത് ആധികാരിക രേഖയായി ഉപയോഗിക്കാം. വിവിധ ആവശ്യങ്ങൾക്കായി അപേക്ഷിക്കുമ്പോൾ അപേക്ഷകന്റെ കൈവശം രേഖകൾ ഇല്ലെങ്കിലും ഓൺലൈൻ വഴി പരിശോധിച്ചാൽ രേഖകളുടെ കൃത്യത ഉറപ്പുവരുത്താൻ അധികൃതർക്കാകും. പാസ്പോർട്ട് ഉൾപ്പെടെയുള്ള അപേക്ഷകൾക്കാണ് ഇത് ഉപകരിക്കുക.