രാജീവ്ഗാന്ധി അനുസ്‌മരണ സമ്മേളനം ഇന്ന് മലപ്പുറത്ത്; പി.കെ. കുഞ്ഞാലിക്കുട്ടി എം.പി. ഉദ്ഘാടനം ചെയ്യും

മലപ്പുറം: രാജീവ്ഗാന്ധി സെന്ററിന്റെ രാജീവ് അനുസ്‌മരണ സമ്മേളനം ഇന്ന് മലപ്പുറത്ത് നടക്കും. നഗരസഭാ ബസ്‌സ്റ്റാൻഡ് ഓഡിറ്റോറിയത്തിൽ നടക്കുന്ന പരിപാടി പി.കെ. കുഞ്ഞാലിക്കുട്ടി എം.പി. ഉദ്ഘാടനം ചെയ്യുമെന്ന് സംഘാടകർ പത്രസമ്മേളനത്തിൽ അറിയിച്ചു. പരിപാടിയിൽ ജില്ലയിൽ പത്താംക്ലാസ്, ഹയർസെക്കൻഡറി പരീക്ഷകളിൽ എല്ലാവിഷയങ്ങൾക്കും എ പ്ലസ് നേടിയ വിദ്യാർഥികൾക്കുള്ള അവാർഡുകൾ എ.പി. അനിൽകുമാർ എം.എൽ.എ. വിതരണംചെയ്യും.

അതോടൊപ്പം രാജീവ്ഗാന്ധി സെന്ററിന്റെ ഈവർഷത്തെ രാജീവ്ഗാന്ധി അവാർഡ് മുൻ മന്ത്രി ആര്യാടൻ മുഹമ്മദിന് നൽകാൻ തീരുമാനിച്ചതായി ഭാരവാഹികൾ അറിയിച്ചു. സെന്ററിന്റെ 10-ാം വാർഷികത്തിന്റെ ഭാഗമായി ഒക്ടോബറിൽ നടക്കുന്ന പരാപടിയിൽ എ.കെ. ആന്റണി അവാർഡ് നൽകും. 25,001 രൂപയാണ് അവാർഡ് തുക. പത്രസമ്മേളനത്തിൽ രാജീവ്‌ഗാന്ധി സെന്റർ പ്രസിഡന്റ് ഇ. മുഹമ്മദ്കുഞ്ഞി, പി.സി. വേലായുധൻകുട്ടി, കെ.എം. ഗിരിജ, പി.ടി. ജോർജ് എന്നിവർ പങ്കെടുത്തു.
Summary: the meeting commemorating former pm Rajiv Gandhi to be held today at Malappuram