തിരുമാന്ധാംകുന്ന് ക്ഷേത്രത്തിലെ ആൽമരം കടപുഴകിവീണു

അങ്ങാടിപ്പുറം : തിരുമാന്ധാംകുന്ന് ഭഗവതീക്ഷേത്രത്തിലെ വടക്കെനടയിലുള്ള ആൽമരം കടപുഴകിവീണു. ശനിയാഴ്ച പുലർച്ചെ ഒരു മണിയോടെയാണ് സംഭവം. വീടുകൾക്കോ കെട്ടിടങ്ങൾക്കോ കേടുപാടുപറ്റിയിട്ടില്ല. നൂറ്റാണ്ടുകൾ പഴക്കമുള്ള അരയാൽ ക്ഷേത്രത്തിലെ ഏറ്റവും പഴക്കമുള്ള മരമാണ്. ക്ഷേത്രനടകൾക്ക് കുറുകെയാണ് ആൽമരം നിലംപതിച്ചത്. അങ്ങാടിപ്പുറം-ഏറാന്തോട് പ്രദേശങ്ങളെ ബന്ധിപ്പിക്കുന്ന കല്ലുപാലത്തിനടുത്താണ് ഈ ആൽമരം. അങ്ങാടിപ്പുറത്തുനിന്ന് ഏറാന്തോട് ഭാഗത്തേക്ക് പോകുന്നവർ ആൽമരത്തിനടിയിലൂടെ നടന്നാണ് പാലം കടന്ന് പോകാറുള്ളത്. രാത്രിയായതിനാൽ അപകടം ഒഴിവായി. മരത്തിന്റെ ചില്ലകൾ നീക്കി നടവഴി ഒരുക്കിയിട്ടുണ്ട്. മരം പൂർണമായും വെട്ടിനീക്കാൻ സമയമെടുക്കുമെന്ന് ക്ഷേത്രഭാരവാഹികൾ അറിയിച്ചു.