പറക്കുന്നത്തും കണക്കർകാവിലും ഇന്ന് പൊങ്കാല

വളാഞ്ചേരി ∙ ചെല്ലൂർ പറക്കുന്നത്ത് ഭഗവതിക്ഷേത്രത്തിലും ഇരിമ്പിളിയം കണക്കർകാവിലും പൊങ്കാല ഇന്ന്. രണ്ടിടത്തും രാവിലെ വിശേഷാൽ പൂജകളോടെ ആരംഭം. വെള്ളരിനിവേദ്യവും വിശേഷം. പറക്കുന്നത്ത് ഭഗവതിക്ഷേത്രത്തിൽ രാവിലെ ദേവിസഹസ്രനാമജപമുണ്ട്. ഒൻപതിനു പൊങ്കാല അടുപ്പുകളിൽ തീയെരിയും.

പാത്തായപ്പുരയ്ക്കൽ നാരായണനുണ്ണിയുടെ നേതൃത്വത്തിലാണ് ചടങ്ങുകൾ. ജില്ലയുടെ വിവിധ ഭാഗങ്ങളിൽ നിന്നുള്ള അനവധി സ്ത്രീകൾ പൊങ്കാല അർപ്പിക്കാൻ എത്തും. ഇരിമ്പിളിയം കണക്കർകാവിലും പൊങ്കാലയർപ്പിക്കുന്നതിനുള്ള എല്ലാ ഒരുക്കങ്ങളും പൂർത്തിയായി. രാവിലെ എട്ടിനു പൊങ്കാല അടുപ്പുകൾ എരിയും. പ്രത്യേക പൂജകളുമുണ്ട്.