വൈക്കത്തൂർ മഹാദേവക്ഷേത്രത്തിലെ ഉത്സവം സമാപിച്ചു

വളാഞ്ചേരി : വൈക്കത്തൂർ മഹാദേവക്ഷേത്രത്തിലെ ഉത്സവം ഞായറാഴ്ച ആറാട്ടോടെ സമാപിച്ചു. കൊടിക്കൂറ ഇറക്കിയശേഷം ക്ഷേത്രക്കുളത്തിലെ തീർഥക്കടവിൽ ആറാട്ടുപൂജ നടന്നു. തന്ത്രി കിഴക്കിനിയേടത്ത് മേക്കാട്ട് മാധവൻ നമ്പൂതിരി മുഖ്യകാർമികത്വം വഹിച്ചു.

മേൽശാന്തി മുണ്ടക്കിഴി കാലടി നാരായണൻ നമ്പൂതിരി, കീഴ്‌മന ഉണ്ണിക്കൃഷ്ണൻ എമ്പ്രാന്തിരി, ചെറുശേരി ഗൗതം നമ്പൂതിരി, പരത നന്ദൻ നമ്പൂതിരി, ഊരാളൻ മഴുവഞ്ചേരി സുരേഷ്‌കുമാർ, പാരമ്പര്യ ട്രസ്റ്റി മഴുവഞ്ചേരി വാസുദേവൻ എന്നിവർ സഹായികളായി. ധാര, വിശേഷാൽപൂജകൾ എന്നിവയുമുണ്ടായി. നേരത്തേ അഷ്ടദ്രവ്യ ഗണപതിഹോമം, കാഴ്ചശീവേലി എന്നിവയും നടന്നു. മഹാനിവേദ്യമായ വിശേഷാൽ ചതുശ്ശതവുമുണ്ടായിരുന്നു.