സമസ്ത പൊതുപരീക്ഷ: മൂല്യനിർണയം തുടങ്ങി

തേഞ്ഞിപ്പലം : സമസ്ത കേരള ഇസ്‍ലാംമത വിദ്യാഭ്യാസബോർഡ് നടത്തിയ പൊതുപരീക്ഷയുടെ മൂല്യനിർണയം ആരംഭിച്ചു. അഞ്ച്, ഏഴ്, പത്ത്, പ്ലസ്ടു ക്ലാസുകളിലാണ് സമസ്ത കേരള ഇസ്‌ലാംമത വിദ്യാഭ്യാസബോർഡ് പൊതുപരീക്ഷ നടത്തുന്നത്. ഈ വർഷത്തെ പൊതുപരീക്ഷയിൽ 2,62,508 കുട്ടികൾ പങ്കെടുത്തിട്ടുണ്ട്. 7220 സെന്ററുകളാണ് പരീക്ഷയ്ക്കുവേണ്ടി ഒരുക്കിയിരുന്നത്. കോവിഡ്-19 പശ്ചാത്തലത്തിൽ ഈവർഷം 129 ഡിവിഷൻ കേന്ദ്രങ്ങളിൽവെച്ചാണ് മൂല്യനിർണയം നടത്തുന്നത്.

ഓരോ ഡിവിഷൻ കേന്ദ്രത്തിലും ഒരു സൂപ്രണ്ടും അസിസ്റ്റന്റ്‌ സൂപ്രണ്ടുമാണ് മൂല്യനിർണയക്യാമ്പിന് നേതൃത്വംനൽകുന്നത്. മൊത്തം 10,50,032 ഉത്തരപേപ്പറുകളാണ് പരിശോധനയ്ക്കുള്ളത്. കോവിഡ്-19 കാരണം വിദേശങ്ങളിൽ ഓൺലൈനായാണ് പരീക്ഷ നടത്തിയിരുന്നത്. മൂല്യനിർണയം പൂർത്തിയാക്കി ടാബുലേഷൻ നടപടികൾക്കുശേഷം ഈമാസം അവസാനത്തോടെ ഫലപ്രഖ്യാപനം നടത്തുമെന്ന് സമസ്ത പരീക്ഷാബോർഡ് ചെയർമാൻ അറിയിച്ചു.