കാടാമ്പുഴ ക്ഷേത്രത്തിൽ പന്ത്രണ്ടുകാരന്റെ തായമ്പക

കാടാമ്പുഴ: കാടാമ്പുഴ ക്ഷേത്രത്തിൽ ദ്രവ്യകലശത്തിന്റെ ഭാഗമായി പന്ത്രണ്ടുകാരൻ തായമ്പക അവതരിപ്പിച്ചു. എടപ്പാൾ പോത്തന്നൂർ കുറുങ്ങാട്ടുമന ശ്രീവരാഹാണ് തായമ്പക അവതരിപ്പിച്ചത്. സന്തോഷ് ആലങ്കോടിന്റെ ശിഷ്യനായ ശ്രീവരാഹ് ജില്ലയിലെ വിവിധ ക്ഷേത്രങ്ങളിൽ തായമ്പക അവതരിപ്പിച്ചിട്ടുണ്ടെങ്കിലും ആദ്യമായാണ് കാടാമ്പുഴ ദേവീസന്നിധിയിൽ തായമ്പക അവതരിപ്പിച്ചത്.

ദൂരദർശൻ ജീവനക്കാരനായ കുറുങ്ങാട് വാസുദേവൻ നമ്പൂതിരിയുടെയും ശ്രീവിദ്യ അന്തർജനത്തിന്റെയും മകനാണ്. അതളൂർ എൻ.എസ്.എസ്. സ്കൂളിലെ എട്ടാംക്ലാസ് വിദ്യാർഥിയാണ്. തൃത്താല കേശവദാസ്, തൃത്താല ശ്രീകുമാർ, മണ്ണാർക്കാട് മോഹൻദാസ്, അനിരുദ്ധ് മാരാർ, എടക്കുളം അനിയൻ മാരാർ, മണികണ്ഠൻ മുളയങ്കാവ്, ദാസൻ എന്നിവർ ഇലന്തലയും വലന്തലയും ഇലത്താളവും കൊട്ടിക്കയറി.