മാലാപറമ്പിൽ ടോറസ് ലോറി പിറകോട്ടിറങ്ങി ബസുകളിൽ ഇടിച്ച് അപകടം; രണ്ട് പേർക്ക് പരിക്ക്

കൊളത്തൂർ : മാലാപറമ്പ് എം.ഇ.എസ്. മെഡിക്കൽ കോളേജിന് സമീപം ടോറസ് ലോറി പിറകോട്ടിറങ്ങി രണ്ട് സ്വകാര്യ ബസുകളിൽ ഇടിച്ചു. വ്യാഴാഴ്ച വൈകുന്നേരം ആറോടെയാണ് അപകടം. പരിക്കേറ്റ ബസ് യാത്രക്കാരായ വള്ളിക്കുന്ന് പരുത്തിക്കാട് പ്രജി നിവാസിൽ തങ്കം(67), ചേമ്പ്ര തിരുവേഗപ്പുറ കൊന്തൊടി ദീപ(39) എന്നിവരെ എം.ഇ.എസ്. മെഡിക്കൽ കോളേജിൽ പ്രവേശിപ്പിച്ചു. മറ്റുള്ളവരുടെ പരിക്ക് സാരമല്ല.

പെരിന്തൽമണ്ണ വളാഞ്ചേരി റോഡിൽ മാലാപറമ്പിൽ കയറ്റം കയറിക്കൊണ്ടിരുന്ന ടോറസ് ലോറിയാണ് പിറകോട്ടിറങ്ങി ബസുകളിൽ ഇടിച്ചത്. വാഹനങ്ങൾ മറിയാത്തതിനാൽ വൻഅപകടം ഒഴിവായി. അപകടത്തെ തുടർന്ന് മണിക്കൂറുകളോളം ഗതാഗതം തടസ്സപ്പെട്ടു.