വളാഞ്ചേരി കഞ്ഞിപ്പുരയിൽ കുഴൽപ്പണവുമായി രണ്ടുപേർ പിടിയിൽ

വളാഞ്ചേരി : വളാഞ്ചേരിക്കടുത്ത് കഞ്ഞിപ്പുരയിൽ കുഴൽപ്പണവേട്ട. 87,65,720 രൂപയാണ് പിടികൂടിയത്. സംഭവവുമായി ബന്ധപ്പെട്ട് കോയമ്പത്തൂർ ശെൽവപുരത്തിനടുത്ത് പോത്തനൂർ സ്വദേശികളായ ശ്രീധർ (64), മനോവ (25) എന്നിവരെ വളാഞ്ചേരി പോലീസ് അറസ്റ്റുചെയ്തു. കാറിൽ രഹസ്യ അറയുണ്ടാക്കി അതിനുള്ളിലാണ് പണം സൂക്ഷിച്ചിരുന്നത്. രഹസ്യവിവരത്തിന്റെ അടിസ്ഥാനത്തിൽ നടത്തിയ വാഹനപരിശോധനയിലാണ് തമിഴ്‌നാട് രജിസ്‌ട്രേഷനിലുള്ള കാറിന്റെ പിൻസീറ്റിന്റെ രഹസ്യ അറയിൽ ഒളിപ്പിച്ച പണം കണ്ടെടുത്തത്. വളാഞ്ചേരി എസ്.എച്ച്.ഒ. കെ.ജെ. ജിനേഷിന്റെ നേതൃത്വത്തിൽ എസ്.ഐ. അജീഷ് കെ. ജോൺ, ഉണ്ണികൃഷ്ണൻ, സിവിൽ പോലീസ് ഓഫീസർ ക്ലിന്റ് ഫെർണാണ്ടസ് എന്നിവരാണ് പണം പിടികൂടിയത്.